姊妹婚禮都唔俾我請假?不如等佢下次結婚我先去賀佢丫?

 

小熊就黎爆啦!每次同阿姐講親請假既問題都係唔愉快收場,何解?

「小熊,你咪岩岩簽左份新約既,咁新約開始前你要放晒舊個份約啲假先架,話時話,點解你明明一年得個十幾日假,可以儲到成廿幾日未放既呢?你兩年無放過假咩?」同事表示一臉驚訝,我呢啲小薯仔竟然要學人「清假」。

諗諗下又係,對上個次連續放左五日假爽歪歪去旅行已經係兩年幾前既事,之後一直做做做,但彷彿老闆無appreciate過,仲認為我OT得唔夠話我個人咩唔夠flexible咁樣樣,人係貪心既,見你咁乖自動自覺留低,咪一直push你push到你出聲投降為止。

我阿姐近年自己新開左條policy,就係嚴禁我地同team之間互相重疊放假日子,一日都唔准!唔批!皆因有次佢自己同我地teammate撞左連續四日假,仲要咁岩都係去外國出席朋友婚禮。照道理我同事比佢早申請假仲已經獲批,係咪以為好完美無位俾人入呢?Office邊有呢枝歌仔唱,呢啲moment梗係拎個職級出黎大石笮死蟹啦!好在我teammate在位廿年,講年資同我阿姐不相伯仲,佢先唔怕呢啲所謂既強權,企硬唔取消假架啦,而且所有因素都有利佢,我阿姐唔能夠硬撼。最後阿姐為面子當然咩都唔理照申請啦,但怕死要報定案俾阿姐個阿姐知,人地一定好奇問點解重疊咁多日,佢竟然話有「勸喻」過我teammate取消但唔聽,焗住一齊放囉唯有。

拿……office係無秘密既,有一日我食完lunch返埋位,見到我個平時係傻大姐既teammate 伏左係台度古古怪怪咁,就行埋啲再行埋啲裝下佢做咩,原來好委屈咁喊緊。「發生左咩事啊?係咪有人恰你?」坐係旁邊既同事都好擔心,圍埋過黎。「頭先大姐大行過黎問我,又會咁岩同阿姐一齊放,我咪同佢講返晒成件事,仲開埋個system佢睇我幾早之前已經申請同埋獲批。我阿姐背後插左我幾箭,講到係我專登同佢爭咁樣,放幾日假係咪要搞到咁啊?我跟足程序做錯啲啊?」一講又忍唔住眼濕濕,件事阿姐諗住搵個藉口當settle就算,其實不過係佢自己要放就放,我地一干閒雜人等阻路就加條罪俾你,有無咁cheap呢?

今次就到我啦,由於有位teammate即將放個幾月大假,而我岩岩受邀做姊妹想請一日假,咁當然拿拿聲apply啦。過左幾日見阿姐無動靜,就主動問下佢,佢先至話:「係啊,我見到你apply左,但阿邊個個段時間會放假,你有無咩特別原因要放?」唉,放一日都要解釋,好啦,今次講埋佢知。點知佢聽完後就話「係咩?唔得!咪講左大家啲假唔可以重疊囉!你咁樣我會俾經理鬧架!你自己cancel番佢啦!或者等阿邊個番黎你先放。」意思係婚禮完左我先去請假?要如果一開頭堅持因為咁而唔俾我放,根本唔洗問我原因架!

做姊妹都係一世人一次,唔可以通融一下?而且放假個位同事係handover手頭上啲野俾我阿姐,所以就算我放一日應該對工作上無大影響。火上心頭之下去請示經理,經理強調只係唔encourage成team得返一個人工作,而非硬性規定有事無事都唔可以重疊假期。最後,雖然獲批了,但係因為放一日假而搞到咁唔高興,覺得好無謂。查實我係咪應該話去見工會比較好呢?