粗口真係好很重要

 

其實由細到大我都好少講粗口,除非真係好嬲好嬲好嬲,因為印象中細個試過講咗一句粗口(_街)就畀阿爸掌嘴,所以細細個開始我就覺得粗口係唔可以亂咁講,同埋啲人成日都話女仔人家唔好講呢啲呀,女仔講粗口好UN耳等等,所以我都盡量少講,直至我入咗一間全女班嘅PR公司。

你知啦做得PR通常個個都係假到死㗎喇,化晒妝、扮得靚靚、斯斯文文,對住個客就溫柔到不得了,笑臉迎人,成個親善大使咁,背住個客就粗粗魯魯,句句粗口,當佢殺父仇人咁鬧。啱啱入職嘅時候佢哋發覺我一句粗口都唔講,簡直當我係珍禽異獸咁嚟觀賞,覺得我好奇怪,而阿姐就好肯定咁講:「不出一個月,你都會同我哋一_樣句句粗口。」我嗰陣唔信,因為我覺得唔需要特登改變自己去融入佢哋,點知最後又真係畀佢講中咗。

一嚟係畀同事影響,日日對住,句句聽住,真係會口快快會講埋一份,但最重要嘅原因都係因為啲客真係好很煩,唔用粗口形容佢哋真係對唔住自己。同埋粗口真係有發泄同治癒作用,明明好嬲,鬧完幾句粗口之後個心真係會舒服好多,個人都平靜啲。最頂癮嘅係粗口真係可以完全表達到一個人嘅憤怒程度或者個客嘅麻煩程度,以下係其中一個例子。

Level 1 個客真係好煩
Level 2 個客真係好很煩
Level 3 個客真係好很7煩
Level 4 個客真係好很79煩
Level 5 個客真係好很79西煩
Level 6 掉!個客真係好很79西煩
Level 7 掉!個_街客真係好很79西煩

我特登無寫粗口正字,但我估大家都明我講緊乜,如果有更高Level嘅版本歡迎留言話我知。以前我做咗啲無聊嘢,阿媽都會話我:「你真係多舊魚。」我當時唔明,仲好傻仔咁問:「點解要多舊魚,唔多舊雞,多舊鴨嘅?」佢點答我已經唔記得咗,當然我到大個就知道原來係「多9餘」咁解。

後來轉咗工,無再遇到咁多麻煩客,就無乜再講粗口喇。雖然我自己少講,但其實我都唔介意其他人講,唔好用嚟鬧我就得,不過啲男同事梗係覺得我會介意,所以甚少會喺我面前講,通常是但一個講咗其他人就會話:「女仔喺度唔好講粗口!」可能我個樣真係唔似爆粗band友啲friend啦哈哈。點都好,粗口真係好很重要,至少嬲嘅時候唔使谷住度氣,可以盡情宣泄,粗口萬歲!