WORK LIFE BALANCE 到唔係你叻,係你太HEA 啊

(photo via cc Flickr user Manoela Padilha)

 

我唔知亦唔明點解放工會乜都做唔到,淨係想攤喺床度鳩碌Facebook,YouTube。「好累啊,唔想出街。」無架,咁咪成世囉,人生就係喺你返埋啲廢工就過左嚕,後悔無左青春,無人要?自己攞黎啦你,錢咁緊要,唔可以放棄啦梗係,仲要用條命黎換啊簡直。

我廢青一名,對將來無任何計劃,儲錢?儲黎托呀?聽日有飯食咪得囉,返埋啲搵得雞碎咁多嘅工咪夠囉,得閒同朋友食下飯,去睇下戲,仲有閒錢去日本旅行濕平,嘩爽啊喂!你唔係要我賣命返工去賺埋啲唔知投胎轉世果陣都買唔買到樓嘅錢啊?貼地啲實際啲啦,諗下去邊度旅街去玩好過啦,樓呢啲我呢啲廢青諗嘅咩。諗真啲,轉過頭份工都辭埋,搵份低過公屋申請入息上限嘅兼職,再唔係就玩埋破產攞綜緩,唔係點叫廢青。

我無搵十萬九千七,但都算有份穩定嘅工,儲蓄佔左差唔多一半,剩低嘅攞黎消遣,唔煙唔酒唔賭博,拎黎睇戲買碟買書去旅行,有時食麥皮當一餐,甚至唔食,疏,係咪太奢侈,唔好意思,我應該餐餐食麵包,麵包都貴,或者嘗試淨係飲水,如果我係有情嘅話應該會飽。如果我零消遣係有助我喺社會搵到個窩居,我願意,但事實係即使我月入四萬,都未必做到。

如果我明知行緊果條係死路,點解我仲行落去?而唔係揀過條生路,最大問題係大家都以為自己無得揀,清醒一下,跳出社會個濕鳩框架,用下你好耐無用嘅腦啦。講埋你聽喇,中庸之道啊,實際啲啦好無啊。