【OCamp系列】全港定向(HKO)雜談

 

有人話OCamp係一個比你認識新世界,接觸不同社交圈子嘅地方,都有人話OCamp係一個只有無盡嘅虛偽交流嘅地方。而最終嘅結果就係會取決於你所選擇嘅OCamp正確與否。呢個世界當然有害群之馬,有好嘅OCamp都當然有唔好嘅,面對種種嘅評論,我會係度同大家首先分享吓我個Fac嘅OCamp,當然,唔好嘅OCamp分享黎又做咩呢?梗係有好野先開心Share啦。

係眾多嘅大學OCamp之中,HKO(香港定向)可謂必不可少嘅項目,通常都係用黎為迎新營打響頭炮嘅節目,而呢一個項目就會令一組裡面不同性格嘅FM都盡顯真性情,例如有最熱血嘅博盡組仔(而本人就係其一),有唔想郁嘅組爸媽,有怕熱怕曬嘅組女,都有冷酷自閉嘅深潛組員。雖然係第一個活動,但係從呢一個活動開始,就會知道你所處嘅小組係否會會成為一個友誼永固,開Sem之後依然會Re-U嘅小組。所謂「三歲定八十」,HKO頭三個鐘嘅表現已經能夠定到黎緊8個Sem嘅生活如何,係孤單過定係開心過。

第一日嘅迎新營主要係由HKO 開始,目嘅係讓新生了解香港。係站內有一前文《大學迎新營-只限港大》中指出

「如果你今日問我或其他大學生玩城市定向(Hong Kong O)有什麼意義,真嘅答不出口,難道話係「了解香港」?」

呢種講法我本人並不認同,因為會抹殺了不少認真搞OCamp嘅學會嘅聲名無辜受損,你試問問新生們,有幾多人依然能夠理直氣壯地話屯門有牛?有幾多人會指出西貢在西邊,而東涌在東邊?有幾多人會認為東南西北區都在香港島?起碼在我所認識嘅人裡面,升了大學二年級仍然不知道呢些問題嘅正解。一句話話抹殺了HKO嘅努力值得嗎?在面對本土意識嘅抬頭,香港嘅學生連自己嘅土地都不認識,談甚麼抗爭,一個連銅鑼灣村和銅鑼灣都分不清嘅人,或者連Tung Lo Wan Road 和 Causeway Road 都不知道係邊兩條街道嘅人,或者連維多利亞城石碑都唔認識嘅人,談何抗爭,談何政治?沒有了HKO嘅努力和啟發,有些新生根本連屯門都從來未曾踏觸,不敢相信輕鐵嘅存在。在輔仁飽覽文章嘅諸位雖然未必相信,但係真有其事,無容置疑。

著名嘅時事評論大師無敵神駒在三年前嘅文章《【大學迎新系列】Ocamp之死,死於名不副實》曾經如此寫道

「城市定向」(City Hunt)美其名在一天之內讓組員之間熟稔、加強合作精神等,實際上已經變得嚴重擾民。有在大街大巷高聲喧鬧嘅、有滋擾途人嘅、有在公共交通工具上騷動嘅,不勝枚舉。

當然,HKO嘅Tasks會有好同唔好嘅,但係最主要都係兩睇,有人會覺得同遊客影相係滋擾途人,都有人覺得係展現香港有活力嘅一面,唔好比其他人覺得香港只係一個窮到只係剩低錢嘅地方,我地呢度嘅年輕人都會有我地呢度嘅青春,有我地自己一套嘅方法去詮釋同演繹青春。但係呢一個HKO唔係單單係一個比大家歡樂嘅地方,其實背後係想大家更加了解個社會嘅實況。當去到深水埗嘅時候,會見到香港宜家面對緊嘅貧窮狀況,到咗赤柱,又會睇到香港嘅極致奢華;當去到屯門嘅時候,可以見到成個住宅滿佈嘅新市鎮,到咗中環,又會睇到香港嘅繁忙商業區。總總嘅對比其實多不勝數,無辦法一一列出,只要你地會去HKO就一定會明白究竟係咩意思。

HKO從來都唔係一個行禮如儀嘅遊戲,唔係一個無咩驚喜時又無咩驚嚇嘅活動。只不過係有唔少害群之馬,愈黎愈頹,只係當HKO係所謂嘅傳統,根本無諗過背後嘅意義何在。當眼白白睇住其他學會愈搞愈差,自己都唔會好受,唯有自己搞HKO嘅時候再認真努力啲啦。係呢度想引用一句我朋友嘅名言:愈收得高分嘅科所搞嘅OCamp質素愈好。雖然唔知點解,但係事實如此,難以駁斥。