我喺YOHO Mall 見到四個OL

(示意圖,作者唔會偷影人哋)

 

元朗係臥虎藏龍嘅地方,如果要搵高人,去YOHO Mall 你唔會失望。

有日約咗朋友食飯,部電腦得返10%電,想搵個插蘇位叉電,行到 starbucks,我見到一個令我眼前一亮嘅奇景。牆邊拖咗條線出嚟,線嘅另一端,係一塊放咗喺枱面嘅拖板。拖板上面,插咗五樣嘢:四部手提電腦,加一個 router。啲電腦同 router 用 LAN 線駁住。電腦面前唔係滿面鼻油嘅死毒撚,而係四個成熟穩重嘅OL,有兩個大概三十歲,其他兩個就廿五六。後生啲嗰個兩着住黑色嘅絲襪,成個格局有啲異常,唔講仲以為佢哋係傾緊咩大 project。我唔係腳膠,所以我正眼都冇望佢哋嘅長腿。我反而好好奇嘅係究竟做乜開會要駁晒 router,仲要喺 starbucks?

本身我嘅角度望唔清楚,仔細一望⋯⋯我見到嘅係一片綠色,畫面上面係

Age of Conquerors?世紀帝國?

你哋四個OL竟然喺 Starbucks 打機?!呢個場面實在太震撼,衝擊咗我對女權主義同辦公室政治嘅想像。喺綠色嘅草地上面,佢哋嘅玉手喺鍵盤上面游轉,畫面上,有人起屋,有人推鹿,有人控scout,但係我漸漸發現佢哋居然係用緊四部電腦控制一個 player,去迎戰三個 hardest。即係佢哋就好似連體嬰一樣,每人控制身體嘅一部份,但係一啲都睇唔出唔協調,每一下鍵盤嘅敲打、滑鼠嘅擺動,都反映緊佢哋幾咁合作無間。

佢哋用嘅係 Frank,我由遊戲早期嘅黑暗時代睇到後帝,佢哋有時會暫停傾戰略,有時會簡潔咁向隊友匯報情況,佢哋眼神嘅堅定有神,彷彿佢哋唔係打緊機,而係喺真正嘅戰場殺敵。我諗楊家女將都不過如此。

打到後半,戰局已定,佢哋開始傾閒偈。

「阿sir 嘅訓練真係好有效。」
「下次可以打四個 hardest。」
「我哋終有一日可以打世界賽!」
「考試嗰日我請咗半日假。過到的話,公司或者會同我哋簽約。」
「好,俾心機練呀,師姐。」

雖然佢哋唔再係十八廿二,但係散發住青春熱血,感染到我。

「先生,我哋唔用㗎喇。你想叉電你用啦。」

我由AOC嘅世界返返去現實,我叉住電,打開我十年冇開過嘅藍色 icon。耳邊好似聽到一句:「就算我哋變晒師奶,我地都會繼續打落去。」

有夢想嘅女人,最誘人。