愛情來的時候

 

每一個人,都有自己所定義嘅一種愛情,係我嘅角度睇嚟,無一段描述可以好準確咁講述愛情究竟係咩,而最重要嘅就係愛情其實無分對錯。有啲人會認為愛情就係隨住自己嘅感覺而行,而有啲人就會覺得愛情係枷鎖,比佢鎖住咗就唔會嘗試去逃脫。

當你被一時嘅激情蒙蔽住自己嘅時候,你會開始諗究竟邊一個人先係真正適合自己嘅個一個。一個就係你認識咗好耐,相處咗好耐嘅女朋友。你地好清楚對方嘅習慣,對方嘅諗法等等。而另一個就係一個你識咗無幾耐嘅人,佢比到你嘅係一種神秘感同埋係一種心跳嘅感覺。雖然你唔係對佢認識好深入,但係平時嚟講你地都好好傾,大家都會有意無意係言語行為上面透露一絲絲嘅曖昧。

你不斷咁思前想後,自己對原本嘅女朋友嘅激情竟然係嗰個女仔身上出現。你開始回想啱啱識你女朋友嘅時光,你發現你都曾經同佢有一段曖昧嘅過程,你地兩個四圍去嘅日子,依然係你嘅心目中佔有一定嘅位置。你唔知道點解呢種感覺會係另一個女仔身上出現,你好困惑,你唔知道應該點算。

一邊係度諗嘅時候,現實就將你扯返轉頭。究竟同咗呢一個女仔一齊之後嘅生活會點,會好過原本嗰個,定係差過原本個個?究竟我應唔應該放棄現有嘅野,跟隨住自己嘅心意出發?究竟我咁樣做會唔會比人冠以一個賤男嘅名號?究竟我係唔係真係鐘意個個人,定係只係一時嘅感覺蒙蔽咗真正嘅我?當你開始咁樣諗嘅時候,就證明你尚算係一個有理性嘅人。

你嘗試壓制住自己嘅一時衝動,比啲時間自己冷靜一吓,睇清楚自己係唔係真正鐘意咗另一個人。隨住一段又一段嘅時間過去,嗰個女仔嘅形象一直係你嘅心中浮現,魂牽夢縈,令你朝思暮想。你無辦法肯定邊一個人更加適合你。

你開始諗,自己係唔係已經係時候做一個決定,斬纜定係應該繼續呢一段同女朋友嘅所謂關係?到呢個時候,你對女朋友只會剩地食之無味棄之可惜嘅感覺,當你因為呢一段關係嘅經歷而選擇留低嘅時候。你可能會搵返自己心目中嘅摯愛,重新燃起愛情之火,但係同時你已經比枷鎖綁住,就咁就一世人。

至於如果你選擇咗同另一個女仔一齊嘅時候,呢一條就係未知嘅路,可能比宜家好,都可能係比宜家更差。因為人總係會貪新忘舊,失去咗先識得珍惜原來嘅嗰一個。但係都可能係搵到自己心目中嘅摯愛,共諧連理。愛情,始終好難一拍即合,唔試過又點會知道邊一個人先真正適合自己?

愛情來的時候,想檔都唔會檔得住。我一直都覺得係一段關係之中,兩方都可以繼續去尋覓真正屬於自己所想嘅野。騎牛搵馬,聽落去係好差嘅事,一直比人污名化。但係,你又有無諗過究竟係咩令人會咁,而愛情又有無分對錯?如果你將愛情等同枷鎖,掛係你自己嘅另一半身上,無比佢尋找真正嘅愛情,咁會係一件好悲哀嘅事情。

「愛情是自由的,沒有束縛;愛情是飄渺的,沒有對錯。」