《煙花,應該和誰看?》一套戲令你知道自己識唔識睇戲(完全劇透)

 

《煙花,應該和誰看?》係一套我好鐘意睇嘅戲,新房昭之係一個我好鐘意嘅導演,岩井俊二係一個我好鐘意嘅作者。但如果你睇完呢套戲,你覺得唔鐘意、唔知佢講乜、唔知自己睇左乜鳩。

好簡單,因為你睇得唔夠多戲。No Offence,睇得多戲又唔係咩成就,只係時間多又或者真係好鐘意睇戲啫。
我心目中真係睇得多戲嘅人,一年大約會睇五百套戲,而我呢,成日嫌自己睇得少,一年睇得一百多D,無鬼用。

睇得唔夠多戲,問題係邊?就係你會唔夠經驗,係攝取資訊嘅經驗。

而呢一套戲,其實故事非常完整,結局非常清晰,要我去形容嘅話,呢套戲係類似考牌咁,考你可以係套戲度拎到幾多資訊。

因為跟住落黎,我要講一個真相比大家知,當然,真相係殘酷嘅,世界係殘酷嘅,劇透亦都係殘酷嘅!

 

——以下嚴重完全海量劇透——

 

其實,男主角(典道),係泳池撞到腳之後,就浸死左,之後所有野,都係佢死前嘅潛意識世界黎。

證據:

1.電影一開場,就睇住男主角浸左係泳池水入面,望住學校泳衣嘅女主角。呢段唔係出字幕前比你低頭食薯片或者開到個電話鬼咁光黎睇WhatsApp用嘅,而係話比你聽,呢個故事嘅主要發生地點係邊,無錯,就係佢游緊水果一刻,反轉身,見到女主角。
之後整套電影,不停出現主角浸係水嘅畫面,可以話係不停提醒大家,佢一路浸係水。

2.游水比賽之前,整個世界都無出現過反物理現象,單車係單車,滑板係滑板,同學係張枱度跳係會跌親。但係遊水比賽之後,跑步可以追到火車,睇野會有透鏡效果,男主角可以輕易避過一個大男人嘅重拳,火車入隧道之後條女唱歌會去左灰姑娘世界,火車會開左出海中心(呢段明顯玩緊《千與千尋》,而《千與千尋》亦好多人話其實一家三口一過隧道就死左)。
點解?因為係佢死前嘅潛意識畫面囉。

3.係泳池見到女主角(及川薺)之前,女主角根本連正眼都無望過佢一眼,我呢度叫呢個女主角做「泳池前」。而之後呢,佢突然同男配角(祐介)表白,突然離家出走,突然甚至同男主角講「最少最後一日想同你一齊過」,呢個「泳池後」呢,好明顯唔係一個真人黎嘅,係一個投影,係女主角係男主角心目中嘅一個投影黎啫。

4.講開「泳池前」同「泳池後」,你會發現男配角係幾次「Time Travel」之後,性格、知識、記憶都係唔同嘅,開頭又話條女醜唔鐘意佢,後尾又鬼咁緊張;開頭明明話煙花係火藥爆炸,一定係圓嘅,後尾又用把扇黎比喻,話煙花一定係扁嘅。
點解?因為主角本身都唔係好了解佢朋友,所以每次投影出黎嘅角色都有偏差囉。

5.講到煙花係圓係扁呢個問題,你會發現男主角一直嘅答案都係:「我唔知。」。咁然後又由於係泳池後嘅世界其實成個都係瀕死嘅男主角潛意識世界黎,所以煙花每次出現,形狀都唔同,因為佢根本就唔知答案。

6.又又因為佢一路都唔知答案,所以最後嘅世界、同埋最後嘅煙花都變成左一個玻璃球,你會係玻璃球度見到城市嘅倒影,因為一切嘅想像,都係由朝早佢見到女主角執個玻璃球開始嘅。
最後你會係玻璃球度睇到世界嘅所有可能,不過,對於主角黎講,世界變成點樣,都已經唔再關佢事啦。

7.最最最明顯嘅提示係結局,男主角又浸返係水,又望住女主角(首尾呼應其實差唔多套套戲都用),只係今次近D,近到可以咀佢。之後男主角點名無到,無啦啦,做乜要話比我聽佢下學期已經唔係度?因為佢怕你以為男主角真係時空穿梭,提醒下你,佢只係浸鬼死左咋。

因為係黑化故事,所以用七點解釋剛剛好。

 

——劇透鉛筆——

 

係呀,事實就係咁殘酷。呢個唔係一個浪漫故事,唔係一個穿越故事,呢個係一個好真實、好殘酷嘅故事。

又當然,呢個只係我個人嘅諗法啦,導演點諗、編劇點諗我鬼知咩,我又唔係佢肚裡面條蟲,正所謂莊周夢蝶,其實呢個世界都係各自解讀,因為每個人可以真實感受到嘅意識就只有一個,就係自己嘅意識。

所以,如果你已經一年睇一千套戲,睇左十幾年,都係覺得唔鐘意、唔知佢講乜、唔知自己睇左乜鳩,其實你無錯,因為你嘅意識就係你嘅意識咁解嫁啫。

最最最後,如果你睇完呢篇文,覺得唔鐘意、唔知我講乜、唔知自己睇左乜鳩。

對唔鳩住囉!