同容海恩食過麥當勞就知佢真係出來撈

 

我印象中,應該喺佢參選2016立法會之前,早已經ADD 左佢FB,嗰陣好似係因為大家都姓容,又見佢有上新聞,有FB 咪ADD。

ADD 左之後,過了好多年都無交流,佢無SHARE 無COMMENT 我啲嘢。但幾年後嘅2017年9月17日,唔知是咪因為補選近了,佢竟然走來R LIKE。

人都癲啵,你咩料呀?大家都係搵食姐,你無嘢俾我又想R 我嘢,有無咁討厭?呢啲人梗係要CAP 圖公審啦。

點知佢竟然埋來講兩句:

 

咁建制派人士來到反對派陣地(好似係),難免有大量口痕友:

 

既然建制派咁鍾意玩派月餅,口痕友一定講架啦

 

佢竟然話好。

之後佢仲直播整餅:

兌現承諾 親手整冰皮月餅

Posted by 容海恩 Eunice Yung on 2017年9月27日

 

咁今日終於食埋。食月餅,唔係食佢。

 

容議員去買雞翼俾我,仲問我全翼/全槌,好細心…. 😘

Posted by 容樂其 on 2017年9月30日

 

建制派搞政治,的確係深知道拉關係嘅重要。

每個人都鍾意被人重視嘅。

當有人笑佢多雀斑,佢問番嗰個人介紹啲嘢來搽面。

當有人笑佢只係識派月餅俾阿婆,佢就親手整足二十個派俾你班口痕友。

當我介紹其中一位同事姓藍係原居民,佢即刻講到沙田排頭村,唔洗諗就UP 得出兩個名(我當然係唔記得),然後藍生話兩位藍生都係住佢隔離。

當我再講佢係會搞打機比賽,佢就即場拿出手機同佢玩番場,仲要扮輸(好似係)。

Eunice Yung 容議員同 Terence Nam 即場玩 Crash Royale (好似係咁串)

Posted by 容樂其 on 2017年9月30日

 

當有出席者拿住兩封請願信突襲,佢從容不迫接完即場拆。

Eunice Yung 即場拆請願信lol

Posted by 容樂其 on 2017年9月30日

 

可能好多人話佢都係靠老豆有錢靠葉太,我就覺得,大把人有錢過佢,大把人聽話過佢,點解到最後係佢代表呢個派系出戰仲要贏,我諗有啲因素係憎佢/憎建制派嘅人睇唔到。

而我都只係剛剛開始認識佢。起碼我而家唔會憎佢。

佢係新民黨立法會議員容海恩,呢個名值得我擺喺心度。

 

PS:咁今日我終於知道點解佢唔理我啲嘢,因為佢俾左部手機我睇,哈,原來UNFOLLOW 左我幾年 :0)