執葉之格?

 

由葉太當日能夠捍衛自己個髮型開始,經過面對七百萬香港人嘅反對都執著為23條立法,可見呢位前保安局局長真心為香港人謀福祉。葉太嘅堅毅同真誠真係連麒麟神獸都阻唔到,真係發叔帶得走,唯有葉隨身。可見林鄭月鵝都曾係佢下屬嘅葉太真係真金不怕紅爐火。睇下,當日被葉太指責 hea足十年嘅港人至愛、識玩 Facebook 識抽水嘅薯片叔叔,選完特首後去咗邊?有邊個會好似葉太咁可以放下身段,作為曾經嘅特首後選人都會積極考慮去補選一個區議員議席。

到今日一直愛黨愛國嘅葉太大義凜然地指斥責同為建制派嘅何君堯「殺無赦!」論係蠢到底嘅時候,葉太竟然反被海量政府支持者誣衊為二五仔、無間道!以葉太身為保安局局長嘅經驗,我相信葉太係有能力睇得出邊個係人邊個係鬼嘅。而且葉太對黨對國對香港嘅守護就如佢當日對掃把頭髮型一樣,忠貞不二。

大家會見到今日嘅葉太,會出現於唔同地區,比林鄭、CY更親民、更真誠地接觸普羅大眾。佢葉太對政治嘅熱誠係真真正正出自內心嘅,睇下,佢唔會好似梁美芬咁問執紙皮婆婆紙皮濕水咁離地嘅問題。而且,葉太係識用香港人最引以為傲嘅電子貨幣八達通嘅,又唔會因為無廁紙而唔痾屎。真小人好多,偽君子更多,今日香港有個坦率果斷嘅葉太為香港人爭取權益嘅葉太,係好值得大家支持嘅。

更重要係,葉太而家受到大量所謂愛黨愛國嘅中國人口誅筆伐,呢班人好多都係何君堯執葉律師嘅支持者。作為本土香港人,我地更要獨立地為葉太撐腰!正所謂人生七十古來稀,葉太今年67歲喇,我地要好好珍惜佢,到佢跟埋發叔走嘅時候,到時就會有更多妖魔鬼怪。

葉留屬宜。