千祈唔好同喪女去蒲

 

「Carla姐⋯⋯你今日先啱啱出院咋喎,真係唔使抖下先?」阿琪扶住Carla姐,望住蘭桂坊,有啲驚青咁講。

「我屌你咩張琪琪,我對波都谷撚埋上心口,你先同我講呢啲?」

「我怕你未好返呀嘛⋯⋯」

「你同我定,唔好話鬼妹,我而家中東佬都打死幾個!」Carla姐一手揈開阿琪,直過馬路。阿琪望住呢個女人嘅背影,嘆咗一口氣。呢條女星期四去蒲,飲大咗兩杯就同鬼妹打架,打到頭破血流,入撚埋廠。今日先啱啱出院,就話星期六晚唔可以錯過,一定要去蒲啦。

Carla姐係阿琪嘅朋友,阿琪失戀嗰時,佢成日拉埋阿琪去蒲,話要幫佢搵新仔。阿琪同佢玩咗兩年,一條仔都冇溝過,但屎就執咗十鑊八鑊,仲要鑊鑊新鮮鑊鑊金。阿琪有時都唔明白,點解自己仲有勇氣陪Carla姐出去玩,或者係因為呢條女太神奇啦。

「Carla姐,答應我,今晚唔好玩到咁喪,得唔得?」搭𨋢上Magnum途中,阿琪鄭重地說。

「得啦屌!」Carla姐頭也不回地出𨋢,走入Magnum。去到舞池,佢跳咗冇兩下,已經同條仔攬埋一舊,瘋狂濕吻。阿琪見慣不怪,遠望住佢戰鬥。

「Mio?」阿琪撞到朋友Mio。

「喂Kristy!好耐冇見啦喎,你同friend嚟?」Mio同阿琪擁抱。

「係呀,哈哈,佢同條仔交流緊呀!」阿琪指一指Carla姐,佢已經同條仔打車輪打到忘我。

「哇屌!條仔咪我個friend Eric囉!」兩條友極之驚喜,佢地拍醒咗Carla姐同Eric,返張枱坐。

一去到,Carla姐就拎起支大vodka隊落個口,先飲為敬,再企上梳化跳舞,同Eric打車輪,打到波都揸埋一份。阿琪望住兩位,只求Eric今晚帶Carla姐早早離場,去維記學術交流下,佢就可以早啲返屋企,第二日返主日學請求上帝原諒。

「Hi,我係Jasper。」同枱一名男子坐近阿琪,向佢伸出右手,呢位Jasper就係阿賢。

「Hi,Kristy。」阿琪微笑並握手。

阿琪同阿賢傾咗一陣,Carla姐同Eric就消失咗。阿琪以為佢地去咗爆房啦,就決定早啲返屋企。正正喺阿賢送佢上的士嗰一刻,佢就接到Mio電話:「Kristy,你個friend出事啦,你快啲返嚟睇佢啦!」

阿琪同阿賢立即返去,一見到Mio就問:「Carla姐發生乜事呀? Eric唔係陪住佢㗎咩?」Mio乜都冇講,只係行開少少,展示佢身後嘅境況——Carla姐瞓喺Eric身上,嘔到仆街,兩腿超展開,條摟屌裙縮到上腰,底褲現形,同條裙連埋一齊,真係似足連身泳衣,十分有趣。

「Carla姐!好彩條底褲仲喺道⋯⋯」阿琪好擔心咁望住Carla姐,見到佢冇咗隻鞋,想幫佢搵返,點知佢一退後,就撞到三個中東佬。

「Fuck that bitch!」班中東佬指住Carla姐係咁屌,阿琪一臉茫然。呢個時候,Mio搵返Carla姐隻鞋返嚟,再同班中東佬say sorry,拎咗$2000出嚟畀佢地,班中東佬先走。

阿賢上前,同阿琪講咗句:「你個friend好唔掂喎,送佢去醫院啦。」又去醫院?阿琪拎起杯水,一嘢淋鳩落Carla姐道:「我仆你個街呀吳潔寧!你老母真係冇幫你改錯名,又唔清潔又唔安寧!你咪撚叫Carla,你叫Disaster啦!」

「呀⋯⋯」可惜,Carla姐冇恢復知覺,只係再一次嘔落Eric套西裝道。

「屌⋯⋯我件老西呀⋯⋯」Eric哀號。

「冇㗎啦,老西賠老西啦!」阿琪指住Carla姐塊西,再一手扯起佢,請三位男士抬佢走。

送院途中,Eric回憶:「佢飲咗杯151之後,就痴咗線!走去中東佬嗰枱,打爛人地啲酒!我即刻捉佢返我地張枱,一返到佢就係咁嘔。你返嚟之後,啲中東路就搵到佢啦⋯⋯」

一句話喺回憶中閃過:「你同我定,唔好話鬼妹,我而家中東佬都打死幾個!」屌,呢條女真係走去搵中東佬隻揪。

屌。

估唔到,出咗院不足二十四小時,Carla姐又入返院啦。阿琪走出病房,見到Eric同Mio已走,得返阿賢喺道。

「點呀?」阿賢上前。

「醫生話等佢瞓多陣,酒醒就可以出院。」

「咁好啦,我送你返去啦。」

「吓?唔等埋佢起身先?佢銀包手機乜柒都唔見晒,冇錢返屋企㗎喎。」

「等佢條命咩,睇死佢都唔係第一次㗎啦,畀啲教訓佢啦。」阿賢認真咁講。

「唉,你都啱嘅。」就係咁,阿琪就同阿賢出咗醫院啦。

事後,Carla姐如何出院,阿琪唔知道。佢只係知道,佢唔會同Carla姐去蒲。因為,條女喪㗎。