數學係中學課程內最冇意義嘅學科

火鳳燎原FB 圖

 

數學固然係現代科學嘅根源,要學習科學嘅知識都必須透過數學計算嚟學習,係科學嘅長河裏面數學絕對存在一定嘅價值,但係點解有咁多考生如此厭惡數學呢?

有啲學生認為如果想學科學知識,可以睇網上嘅科學短片,根本唔使自己嘥咁多時間去學數學,況且唔係個個學生都對科學有興趣。有啲學生未來嘅理想係文學家或者文科老師等,根本唔需要用到數學,對佢地嚟講學習數學根本就只係應對考試。

另一方面,有啲學生又認為數學實用性好低,平時會話,買橙根本都唔會用到數學,因為部收銀機會計。日常生活中亦好少機會會接觸到數學,所以認為數學係多餘嘅嘢。

熟背數學公式、定理,甚至將個對數表倒背如流,相信一定會有考生咁樣溫習,但係當中有幾多個唔係只係為左應付考試?

數學有無用,都只可以話係見仁見智了,取決於大家嘅興趣又或將來嘅理想。但係既然考試話明要考數學,我哋都唔可以唔溫,就算唔鍾意都要硬著頭皮溫埋佢啦~

 

(本文真係因為善心大發,為咗幫人出名而寫,等佢快啲有雙位數嘅like)

 


 

早排台灣無端掀起廢除文言文教育嘅風潮,結果以保留文言文教育為結果落幕(好似係),不過成個網絡輿情就將文言文同統派掛鉤,又話學嚟冇用云云。本嚟我都係冇打算畀咩反應,不過就估唔到有人(仁?)想將呢個風潮燒過嚟香港。

點都好啦,呢位仁兄(以及唔少網絡輿論)嘅講法,可以用一句說話總結:

學生冇興趣嘅嘢,學校就唔可以教!

想唔想學同有冇需要學,其實真係兩回事嚟。雖然香港嘅教育制度屢遭咎病,但爛船還爛船,至少制定課程嘅人唔會完全係外行。十幾年前我哋鬧政府「外行帶內行」,點解到咗今日當自己都係外行指點內行嘅時候又唔記得呢句說話呢?中學課程入面真係有多啲嘢,過咗會考同A-level(依家係DSE啦)就真係呢世都唔會再用。但係,列入課程嘅嘢,其實(理論上)係所有學科嘅基礎同生活嘅基本知識。例如話,我學極都唔識嘅物理,一開始嘅「熱學」部分講「熱容量」嗰度,學完之後唔好話日常生活唔用,根本連考都未必會考。不過,原來貴價到整穿梭機隔熱、閒到用鋁製容器解凍冰鮮雞,都係同呢課有關;地理堂講嘅一啲乜風乜雨,你以為係背完就算,其實佢話緊畀你聽,入秋之後一落雨就記得帶多件衫因住凍親。種種內容,你以為係冇咩用,但原來全部都會有啲用。

再者,文言文係唔係真係冇用架呢?呢個問題某程度上都幾主觀。可能有人真係會答你:做醫生唔使識、擔泥唔使識,日常生活又唔講,只係得中文老師要識,而中文老師靠佢搵食,所以利益上佢哋好反對廢除文言文,一切都係中文教育界嘅私利。但係我又見過一位醫生教佢嘅師弟作詩填詞,又見過中學時背文言文好叻嘅人去咗紮鐵。唔講遠講我自己屋企,我老豆就真係做三行嘅,但細個未返學佢已經喺度教我唸《明日歌》(雖然叫係好淺白嘅作品);同時間有啲中文老師真係好似唔多識中文咁,都唔知佢點讀個大學學位返嚟嘅。

而且,我哋嘅日常生活又的確有機會運用得到喺文言文入面學到嘅嘢,簡單如某啲告示或者敬語,係用緊文言文常見嘅句式去寫;至於複雜啲嘅文學創作,即使係用緊語體文甚至係所謂嘅粵文,多少都會有文言文帶畀我哋嘅修辭技巧。我哋唔覺用緊,係因為我哋背過晒學過晒之後,將呢啲知識內化咗,變成自己嘅嘢,不自覺咁用到出嚟。相比之下,「熱容量」、「鋒面雨」呢啲都未必可以咁深入學生嘅心。另一方面,如果真係冇用就唔學,一個人真係可以成世都唔識微積分都唔會喺日常生活度遇到咩困難,咁冇用,點解我哋唔將數學堂減走大半,換成會計堂呢?

又話分兩頭啦,我又唔知有幾多家長會見個仔識講嘢就開始教佢唸《明日歌》,不過呢個都係文言文日常生活嘅應用嚟架~

講返呢位作者嘅作品啦,佢嘅漫畫首先係有問題嘅,就係將中文字解當成文言文。個字今日唔用,唔代表佢變成一個冇意思嘅字,而且得個單字其實真係唔知佢係咩文嚟架嘛,話唔埋係日文呢。更何況,作者一開始真係連個字都解錯咗,連帶幅漫畫嘅劇情都出咗問題。如果話漫畫都只係微枝末節,咁佢嘅解釋文字問題就更大。

有咩問題?我咪演示咗一次囉!