該當感謝那位遺棄我的人

 

睇咗少女漫畫若干年(嗯,唔講幾多啦,我永遠十七歲嫁嘛),最深刻嘅場景一定一定係<はつ恋は雪のように淡くて>最後夢中相見嘅一幕。

但講到最震撼嘅,我諗都係NTR嘅場景。不論係水瀬藍<なみだうさぎ~制服の片想い>鳴海君發現自己嘅真心,呢頭同萌愛分手,嗰頭喺同一個地方同桃花告白;還是池山田剛<萌えカレ!!>宝くん因為亜美遭遇交通意外需要照顧,而同ひかる分開去陪伴亜美(扯開一筆,分手前嘅初夜呢幕,對糖糖嚟講都好深刻OTZ),最後ひかる揀咗新くん一齊直到最後,宝くん後嚟幾後悔、亜美肯放人都已經太遲;甚或水波風南<狂想ヘヴン>入面,蒼以くん同水結講「你無背叛到夏壱,只係我搶咗你過嚟」(謎之聲:蒼以くんカッコよかった♡),上述咁多咁多幕,都各自令到糖糖唔function咗若干日子。

我唔知係唔係因為自己曾經俾人NTR過,如陽光伴我一樣陰影揮之不去,所以對呢種情節咁敏感;但去到今時今日回頭望,我大概感謝當年為我提供呢種經歷嘅嗰一個人。唔係正能樣,更唔係抖M(謎之聲:你唔係抖M,說服力喺邊?),只係佢教識咗我:道德枷鎖、是非對錯都唔係唔俾自己去愛一件事、一個人嘅理由,如果我真係咁愛,我自然會願意捨棄一切、犧牲一切咁樣去得到佢。呢樣嘢,我要去到認識得到六位大神之後先至理解、經歷咗第一次擦身而過,真係如願以償成為咗悲劇女主角之後先明白,原來嗰個人親身教識咗我咁樣嘅一件事。當然,以反面教材而論,佢都教識咗我要哀矜勿喜,令我懂得點樣更加得體咁樣做人。

如果唔係佢,我真係唔會成長到今時今日咁樣嘅模樣(正面意思);雖然,代價係難免有少少後遺症,譬如成日跳掣(最近四十八小時跳咗三次)、又或做人成日好無動力,有瞬間嘅熱度之後秒速降到冰點,伴隨跳掣急凍效果更佳(?)。

有好多事情依然需要我去面對,一步一步咁樣成長。雖然一個人嘅力量微不足道,而我身邊又無太陽,要擺脫呢個狀況有啲困難。縱然我唔係月,需要依賴反射太陽光嚟令自己明亮;就算夜行屬性嘅我其實怕曬,我依然希望有機會可以親口對某人講出「你係我嘅太陽」,由衷咁樣多謝呢一個人。

同情するなら結婚して、なんてね♡