禾副Gucci眼鏡六百幾蚊咋

 

尋日有個阿叔入左黎我鋪頭,
用帶住濃濃鄉音嘅(廣東話)同我講:
「喂,拿 D burberry 給禾試。」

俾左幾隻佢試之後,
佢就問這些賣多少?
咁當然唔同 model 會有啲分別,
大約都係一千至千鬆啲左右。

佢就轉左唱山歌 mode:
「嘩,貢貴?禾戴梗副菇馳上年配都係六百幾咋!
禾識人做眼鏡架,知李地賣眼鏡賺巧多架。
呢啲貢既膠,成本幾十蚊咋嘛,值乜野錢呀?」

我當然唔會即場同佢講:
「阿叔,你副Gucci配左一年,
紅綠間又甩晒咁濟,
個 G 字金屬扣一睇就知假架啦,
金色扣又甩淨四分一,
你都仲好意思咁大聲同人講配六百幾嘅?
呢種咁既 D 貨級數你都肯用六百幾買呀?
你被人呃左啦,下次自己上淘寶買啦,
連埋運費都唔洗三百,
再唔係自己上一轉深圳配啦,
A 貨到 B 貨都有,任君選擇,
但就貴少少連埋車費可能一千蚊左右。」

係心入面FF完呢番說話之後,
我就微笑住咁同佢講:
「嘩,六百蚊一副 Gucci 好抵喎,
我地賣個啲原裝行貨就番貨都唔止啦,
或者你去番個到配啦:)」

坦白講阿,Gucc嘅番貨價同六百幾蚊,
仲有一段好大好大好大既距離呀。
如果真係計成本既,
咁一杯賣緊四十蚊既Starbucks,
一件賣緊四百五十蚊既 Superdry T shirt,
一條賣緊幾千蚊既 Pandora 成本係幾多?
如果我係開廠大量做眼鏡既,
又可以隨便俾我印個 G 字上去,
咁我咪賺得多囉,傻豬。

仲有,呢個世界真係一分錢一分貨架!
朋友搭廉航,用好低既價錢得到一張機票,
但你有無諗過呢間公司點解可以做到咁平?
有乜野原因其他公司做唔到呢個價錢?
你要承受番乜野風險?
首先,航班取消或者延誤係風險,
其他上落機嘅配套都係風險,
我試過飛到番香港,但無接駁車俾我地,
係飛機行番入機場,所以係機上面等左兩個鐘。
仲有就係飛機硬件呢?
啲第 N 手機係飛左幾十年番新再改裝,
所以可以好平好平咁買番黎,
當然仲有好多我地唔知道既原因啦~

但有乜事發生個陣,你需要明白,
呢啲風險係你用平左既價錢換埋番黎架!

人地做生意,係要盈利架,
人地唔係開善堂架!
低左既價錢,代表犧牲左部份嘢,
減少左部份成本,
而犧牲左既,減少左既係乜?
你永遠都唔會想知道事實:)

我做生意就好簡單,
我過唔到自己嘅就做唔出,
唔會為左價錢而賣假野,
或者係啲不知名供應商入啲比正常番貨價平好多嘅貨,
唔會收左貴價話俾隻靚鏡片俾你但轉頭又搏你唔識俾番平既鏡你。

如果你覺得人地啲野平啲,
又願意承擔風險既,唔買我真係 OK 架:)

但話講番轉頭,
朋友或者介紹黎既自己人,
我會收得再平啲係真。
所以介紹朋友黎真係要搵我,同記得撻朵喔~

 

荃灣南豐中心3樓305E號鋪
本眼鏡店 由理工大學眼科視光師主理
對正 KFC 肯德基架 🙂