點解香港培育唔到拎諾貝爾獎嘅人才?

 

 

D人成日問點解香港培育唔到拎諾貝爾獎既人才。呢個話題,真係好好笑。笑到稍一不留神,腸都會跌晒出黎執唔番。

首先,我見到某位人兄已經好啜核咁道出左拎諾貝爾獎既獎金係唔夠俾錢買香港樓既首期既。無錯,諾貝爾獎呢D一來獎金少過八千萬六合彩,二來就算你係奇才都要等三四十年臨死先拎到獎,言則係老豆老母睇唔到呢一日威威唔到,三來呢D小圈子外國勢力野,香港依家背靠祖國多年,係要靠呢D發圍架咩?要拎就拎一帶一路貢獻獎學金咪仲好。

依家要緊記既係,香港人生仔女出黎,都係想安安份份咁出人頭地,而所謂既出人頭地係唔包拎諾貝爾。做個醫生律師咪幾好,最好有個全國政協做下,你搞咩做研究呀?讀咩PhD 呀?知唔知讀博士多數無人要唔係就離婚架?最多最後咪只係係大學做教蓄?隨時上流唔到只係得下流,最後係SPACE 做客席講師渣。年青人,做人唔好咁大想頭好無?

諾貝爾獎?我落你老味。可唔可以踏實少少呢?係,要去外國大學如史丹福讀,但要求只係浸過下鹹水,言下之意就唔係真係要有咩深造,而係最後返黎選下區議員再等受政治任命。諾貝爾獎係離地既,但係贏在起跑線就係實在同埋全港家長都有切膚之痛既——所以十個九個撲學校搞捐獻砌portfo 果陣都話:

我都唔想架。但遊戲規則係咁玩呀嘛。我地幾無奈都要接受。所以要有好大學就要有好中學就要有好小學好幼稚園好preschool 有好精子。。。講到最尾,無諾獎事小,考唔到直資事大。只要贏在起跑線就得啦,我理得我個仔係愛恩思坦二世咩?總之理科文科一定唔可以讀。最穩陣都係醫科同律師喔(minor ok!)。。。

係,香港無科研,政府固之然抵屌,但係家長之祈唔好唔記得與此同時屌埋自己先喎。今晚行房記住計清楚係咪生到大B呀。呢樣發明,隨時拎諾貝爾獎都唔定。委員會可以考慮頒俾全港家長。將頒獎禮改係男拔舉行。一定無空凳。

 

(作者簡介:為口響人士,口是心非身體很誠實委員會副主席。認同自己有仔女即會改弦易轍,轉軑快過葉國謙。)