【波叔信箱】外母話一齊住…

燦爛的外母劇照)

 

波叔你好:

尋晚中秋,慣常地去左女朋友屋企做節。
食食下飯,未來外母就開始講野啦:佢希望我地可以快啲結婚‥‥‥我係好愛我女朋友,當然亦都好想快啲結婚,但係宜家呢個時勢,點樣結啊?結婚就要一齊住,一齊住就要有樓!一係買,一係租,首期我就無架啦,如果話租樓都仲得既,但係就要完全放棄宜家個生活,仲要好慳先得。於是我就好坦白咁答無錢,點知未來外母竟然建議結左婚之後搬去同佢住!!!
間屋係幾正既,六百幾呎,坑口,近地鐵,只係廿幾年樓齡係舊左少少。兩個人住就話好姐,但係未來外母呢個建議係三人一屋啊,間屋多左一個人喎?我梗係當場拒絕啦!

之後成餐飯就變左沉默飯局啦。

事後女朋友梗係係咁怨我點解唔 say yes啦。佢單親家庭,自少就同媽咪相依為命,佢話就算結左婚都唔打算掉低媽咪一個人。

唉,今年先拍緊第二年拖,仲未諗過話結婚,從來無諗過無傾過呢個話題,今次俾人突襲,真係唔知點算好?

波叔請問你有咩建議?

焦慮既Antonio上

 


 

Antonio bb

你真係個傻bb黎架。我係你我一定答好!

我明白既,無左所謂既「二人世界」聽落去係好慘,但係馬死都要落地行架啦,鬼叫你窮啊!同外母住呢個選擇堅係可以慳返唔少,慳埋慳埋既錢咪去旅行囉,斷估都唔會係三人嬲嬲團架?到時你地咪二人世界飽佢囉!宜家香港地,返工放工,你仲有幾多時間會留係屋企二人世界啊?你將來同外母住,返到屋企有飯食有湯飲,呢個咁溫馨既場面唔好咩?!

再者啊,你女朋友自少就同阿媽相依為命,就算俾你地兩個人搬出去住,佢一個星期返去食三次飯,走黎走去你估唔攰架?到時你攰到咩性趣都無晒仲講咩二人世界啊?

講真,你真係愛你女朋友,尊重佢意願,愛屋及烏啦。咁啦,你趁今日中秋假或者呢個週末同女朋友去裝修鋪睇下,然後叫女朋友返去同外母講話裝修,錢就一定係你地兩個俾架啦,睇下有無得彎轉啦!

波叔