我大學畢業,我應徵看更

 

 

「係,唔好意思,我想見工面試應徵做呢棟大廈既看更。。。」

柒頭如我,大學畢業,站著如嘍囉。但係人人都係想飛黃騰達,我自己只係想安安定定搵番幾皮駛下,應該反其道而行,唔會有咩問題掛。點知,個申請既阿嬸望住我,冷笑一聲:「後生仔,填左呢張form 先啦,然後去入面坐一陣。一陣會有職員帶領你去做甄選。」然後佢又要補多一句:

「今年一個看更位有二萬人爭一個位呀。我勸你就好好準備好裝備下至好黎喇。嘿。嘿。嘿。」果幾下意味不明既笑聲,我真係唔知代表左乜。但係舊時D看更,都係刨下馬經訓下覺同埋同街坊講下甜故笑話架渣喎,有咩野skill set呀?Anyway,表我就填左,然後真係俾人引領左去另一個地方,係一個類似體育館既觀眾席。發現入面一早已經萬人空巷。

我隔離坐左個好似曹星如咁fit 既人。我問,究竟之後會發生咩事。「下乜你唔知咩,一陣就會舉行天下一看更武道會大賽,邊個成為冠軍,就可以奪得看更一個職位。」我即刻驚到手騰腳又震,「我,我,我完全唔識打架喎。咁點算呀?」旺角曹星如就揚一揚眉,聲如洪鐘咁問我:

「咁呀,其實聽聞大會有兩個位既。一個就俾好打得;另一個就係如果你有獵人協會頒下既高級文憑,又或者你有專業秘書資格。又或者如果你係IT9,可以每分鐘dup 到3-40行code,或者都可以嘗試以筆試狀元資格去參加選拔既。不過既然你坐下係度,就即係乜都無啦。唔緊要啦,打下先啦,話唔定你執死雞可以贏到呢。」

果然,好快大光燈係體育館既正上方亮起,然後一個身穿西裝既黃色頭髮戴墨鏡既人行左出黎,朗聲道:「我諗大家都躍躍欲試,正所謂事不宜遲,大家即刻開始,就以大亂鬥既方式黎一決雌雄啦。比賽規則好簡單,就係倒下取消資格,離開場館取消資格,亦都唔可以打爛公物,調轉國旗亦通通唔得。」

然後梆子一聲響,比試已經開始,我已經聽到背後即刻轉黎一下又一下既爆炸聲。。。