明月幾時有,把酒食碌柚。

 

中秋,必定有個圓圓嘅月光。每年嘅中秋,當見到圓圓嘅月光,我一定會諗起一樣嘢⋯⋯

故事,必須從那年year one講起。

那年year one,中秋前一晚,宿舍外面有好多人聚埋一齊,你果邊玩燈籠,我呢邊就切月餅。

突然有一方有好多人大叫,成個草地嘅人都圍咗過去,原來有幾個男宿生整咗個「勁啪碌柚」比賽。

個比賽一下子成為所有宿舍嘅焦點,每個宿舍都開始搵人出黎比賽,我宿舍就搵咗我做其中一個代表。

比賽迅速開始。

一隻隻原個大碌柚放喺參賽者面前。

「三、二、一。」

「快d呀Jayford。」
「差一kai 咋強尼。」
「明仔,上呀,吸汁呀。」

最後,我快d。

我快d⋯⋯

我問你,你知唔知有咩慘得過食一舊屎?

就係食兩舊屎。

同樣,有咩慘得過吞成個碌柚?

冇錯,就係吞兩大個原個碌柚。

有第一round,就有第二round。宿生小強話要挑機,將成個新碌柚放喺我面前。

「我堅飽,堅飽。」

「嘩乜何宿d人咁唔duk ga。」

Ai……食就食,我第一次覺得碌柚原來咁多汁……一食完,個肚好多汁,我即刻想吐。呢個時候,有個女仔遞咗張tempo比我。

(我同佢既故事,喺呢刻開始。而呢刻嘅相遇,亦都成為我之後三年副修中文系嘅原因,之後嘅文章有機會再講。)

「你做咩咁chur。」
「大家叫到,好難唔chur。」

咁樣一chur,我chur咗個中秋節故事,今日分享比大家。

中秋,必定有個圓圓嘅月光。有人見到圓圓嘅月光會思鄕,有人會掛念在遠方留學嘅愛人。而我,每年嘅中秋,當見到圓圓嘅月光,一定會諗起,當年果兩個大大嘅碌柚。

小故事,小分享。

中秋節快樂。

Jayford

 

古曰:「做大事,願付出畢生代價。」
我寫嘅短文,如果可以令大家笑下,
如果可以改變下個社會,我就未會作罷。

FB| Jayford.Wong