男人細心真係殺哂

 

成日都有人問究竟點先溝到女,型英帥靚正、大隻同有錢呢啲咁膚淺嘅嘢唔講喇,你估個個都係富二代兼吳彥祖咁款咩,現實啲啦喂!其實大部分人都係普通打工仔一個,份糧夠食夠玩夠畀家用而經好好啦,如果仲要下下送禮請食飯咁追女或者拍拖真係幾大壓力,我唔係男人所以我真係唔識講啲咩溝女必殺技,我只係可以分享下從女仔角度出發,邊啲moment會覺得好窩心,以下列舉幾個:

夏天曬到死,當你喺條街度行到大汗疊細汗,妝又溶埋,擔心會臭親人嘅時候,男人竟然會問你要唔要飲水,或者拎張紙巾出嚟比你抹,話驚你中暑;當你放工攰到死兼肩頸膊痛嘅時候,男人一見面就問你個袋係咪好重,要唔要幫你袋咁啲;食飯食到天一半地一半嘅時候會拎包紙巾出嚟問你要唔要整返張;約你睇戲預早上網買定飛,明明只會怕熱唔會怕凍,但都仲會帶多件外套驚你凍親;落雨會帶遮,就算無帶都即刻買返把,唔想你淋濕,然後擔遮嘅時候總係會遮你嗰邊多啲。

以上都係簡單到暈嘅嘢,基本上係男人都做到,雖然係好小事,但女人就會覺得:「咦,佢都幾細心喎。」自自然會暗暗加分,可能你睇完會話:「喂,我以上做晒都唔得喎,回水!」唓,咁好正常啫,愛情呢家嘢係咁㗎啦,有feel就乜都得,無feel就乜都唔得,而且個個女人嘅諗法都唔同,我buy細心可能你女神buy「Pan多拿」呢。無可否認,女人都真係「好難捉摸呀」!

其實細心呢家嘢係無分男女,女人都可以做以上嘅嘢,一樣可以加分,不過男人做效果更佳咁解,因為傳統社會都將女人定型,女人細心係應份,女人帶遮好正常啫,女人都無帶紙巾,唔係掛?點都好,為人為自己,做人細心一定無死。