【塔羅個案】個客驚老婆驚到唔想返屋企

 

唔知大家對家暴嘅定義係咩,最容易理解嘅當然係直接或意圖造成身體上傷害,除此之外,我覺得言語傷害或者精神壓迫都算係一種軟暴力,今次個案主角阿輝就係一個例子。

阿輝讀完副學士就出黎做嘢,同中學同學兩年後奉子成婚,當時二人拍拖四年,阿輝結婚時 25 歲。以一個中等學歷嘅人黎講,阿輝嘅工作算係唔錯,喺大公司入面做個文員仔,勤力做少說話,每個月都叫有萬六蚊人工。

不過阿輝黎搵我並唔係想問工作,而係問婚姻。

「如果你怕難講出口,唔駛逼自己講件事我聽,你直接問問題都得架。」大家可能以為女性先偏好玩塔羅,其實面對人生或者感情問題黎搵我嘅男性,都佔咗客量嘅三分一。不過要引導男性開口講出煩惱,通常都需要較多耐性。

「唔係呀,我想講架,不過,神婆,第一次見就講呢啲,我都唔係幾好意思,但係⋯⋯」阿輝靜咗落黎,對眼開始泛紅,「我實在係唔知可以同邊個講喇,我真係唔知。」

講完呢句,阿輝拎咗張紙巾,除低副眼鏡,「唔好意思,有啲激動。」

話說阿輝老婆 Nicole 結婚之後,話要照顧小朋友,自然就無再出黎做嘢,但就好鍾意上啲師奶 Kingdom 之類嘅網站。開頭 Nicole 就話想睇多啲嬰兒資訊,後尾就睇埋網友嘅曬命結婚Post。

「其實都唔知點解要嫁比你,點解要生B。」老婆食住阿輝買返黎嘅吉野家,一路比電話啲 Cap 圖阿輝睇,「人地閒閒地都去韓國台灣影婚紗相,我地去荃灣啲影樓咋!」

阿輝唔出聲,雖然係荃灣影樓影,但當時個老婆搵兩個人化妝 set 頭,明明個當個妝化到鬼咁後現代,唔化好過化,但係「條數貴到我想當場反佢枱架!」咁樣。

而喺老婆比自己睇個 post 入面,有啲係網友喺希臘影嘅婚紗相啦、有啲喺金鐘香格里拉擺酒嘅相啦,「你睇吓,人地全個場都係新鮮花裝飾架!你睇吓人地啲老公幾鍚老婆先得架!」但係阿輝望住啲相,淨係覺得好似另一個世界咁;係,有啲同學或者同事家境好,結婚都好有派頭,不過……

「老婆,你都知我地環境無人地咁好,咁……」

唔講還好,一講,Nicole 即刻爆發。

「咁點解你搵咁少錢吖!」
「點解做咗年半都唔升職呀?」
「你呀,晏晝食茶仔唔要凍飲都可以日日慳三蚊啦!叫咗你慳啲,你有無聽過我講吖?」

呢個時候,我講咗句,「其實帶飯可能會真係慳到錢嘅。」

Again,唔講還好,一講,阿輝差啲喊出聲。原來結婚之後,老婆都無自己煮過飯,餐餐唔係外母送飯黎,就係兩條友食外賣;至於點解 Nicole 唔煮飯,當事人當時嘅回應如下。

「你比好多家用我呀?湊住個仔你估我好得閒呀?你有錢請工人,我咪有時間落去買餸囉,你無錢我都同你捱飯盒呀!」講到呢度老婆聲淚俱下,「人地 Karen 老公每星期同佢食一次 fine dinner 呀,幾千蚊落樓嗰隻呀!你比到啲咩我呀?吉野家呀!打邊爐都係去大家樂咋!你話你有咩資格要求我為你做嘢呀?」

錢,錢,錢。Nicole 淨係識比較,淨係駛埋怨;面對住咁嘅老婆,阿輝其實真係好唔開心,好想放棄所有嘢,甚至諗過上大廈天台,一了百了。

但係一諗到個仔,阿輝又唔忍心。

而到阿輝忍唔住黎搵我傾計嘅時候,事情已經演變成如果遲交家用,Nicole 會鎖大門唔比佢返入屋,直至佢籌夠錢為止;如果 Nicole 心情唔好,阿輝就要出廳瞓。至於個仔,唔知係咪日日聽老母鬧得老竇多,「我覺得我三歲嘅仔望住我嘅眼神,好似笑緊我廢咁」。

正因為係咁,阿輝上星期開始,匿咗返自己屋企瞓,雖然日日比阿媽「咁個孫點算呀」「兩公婆無隔夜仇」咁樣言語轟炸,但起碼放工返到屋企叫有啖熱湯飲吓。

阿輝黎問,應唔應該離婚,拎埋個小朋友比自己阿媽湊算。咁開牌結果係可行嘅,因為咁樣對小朋友成長絕對係好過日日聽住 Nicole 鬧阿輝;只不過阿輝自己始終落唔到決心。

各位朋友睇到呢度,又覺得阿輝應唔應該離婚呢?

 

【塔羅牌個案分享】