Dem Beat 嘅功能——「何東」兩個字係短短31秒既片入面就出現左4次

 

近排hit到成個Facebook都見到班黃衫人係度dem beat(HKU叫Dem Cheer,但小弟唔係HKU,所以都係叫番Dem Beat),身為一個社會學系學生,見到咁有趣既社會現象,緊係要拎出黎分析一下啦。真心講句,成2010年既陳年舊片都比人摷番出黎講,其實都幾慘。但係小弟身為一個大學生,亦都曾經去過ocamp,見到咁既情況都幾有同感,究竟dem beat係唔係白痴呢啲價值判斷既野,就留番比各位去判斷啦。小弟係呢度就分析一下呢個現象本身究竟有咩作用啦。

Dem beat呢家野,唔知點解通常大學既ocamp、上莊、hall o都一定會有呢舊野既存在,至少係大學文化入面不可缺少既一部份。通常去親ocamp,一班人第一次見面,第一樣野就緊係會諗組名同埋諗下點樣dem beat,其實咁做係因為可以用最短既時間,將一班完全唔熟悉既人group埋一齊,大家傾下諗下貢獻下啲ideas出黎(通常都係組爸媽諗),最後就會生產到一個beat,由大家完全唔熟悉到共同協作製造到一啲成果出黎,呢個就係一個社會整合既過程(social integration),呢個過程對於一個群體既存在係必須既。

而一個有意義既beat係應該讓參與者感到有強烈既認同感,令到參與者覺得自己係屬於呢個群體既一份子,提高整個群體既團結性(social solidarity)。睇番何東beat,「何東」兩個字係短短31秒既片入面就出現左4次,睇黎佢地都幾enjoy自己身為何東既一份子。至於點解要咁強調自己係何東?其實係因為HKU存在好多間舍堂,唔同舍堂有唔同既特色,何東只係其中一間。而為左令佢地對自己既舍堂有強烈既認同感,其中一個方法就係強調番何東既特色,令到佢地產生共同既價值信念(shared belief),認同呢個係自己舍堂既特色之一,並且區分(differentiate)自己同其他舍堂既分別。

至於何東到底有乜野特色?我地睇番何東beat,原來何東人不但精明能幹,做野爽快;會煮糖水,又會煲粥。單單四句,已經概括地勾勒出何東既特色,帶比觀眾對於何東既一個普遍印象。至於呢幾句說話,係咪代表到何東舍堂,小弟未讀過HKU就唔清楚啦,但係小弟所知既係,要成功地建構一個群體,清晰既集體意識(collective consciousness)係非常重要既,所以點解dem beat要重覆又重覆咁dem,食飯又dem,玩game又dem,落地鐵站又dem,目的就係強化緊呢種集體意識,增強群體既凝聚力(social cohesion)。

其實簡單啲講,dem beat呢樣野只係想凝聚一班人,打破大家之間既隔膜,等大家之後容易d相處姐。無論係和聲beat定係何東beat,呢d野大家茶餘飯後當下話題就算啦,又無話岩定錯既。

 

如果大家對社會學有興趣,可以用隻手,like下個page。小弟個page岩岩開,文章數量唔係好多,希望大家多多支持。