消失殆盡的愛情

 

最近睇得多愛情語錄,個人由好作狀變到好撚作狀,用詞會矯情啲。

有位朋友F講起佢同佢身邊人,F好少認真喜歡一個人,一真係有感情瓜葛就會放晒所有感情落去。雖然會帶俾對方好大壓力,但係如果對方夠喜歡自己,我認為呢個都只係小問題,雙方溝通夠,揾到大家都接受嘅相處模式就可以。

偏偏,原來人地只係喜歡由F到得到嘅虛榮感同自我滿足。

事關F就話一齊耐咗,呢位身邊人有小小不滿就大發脾氣,又成日嫌自己煩,F諗住同對方傾下,阿身邊人一唔啱聽又發哂火咁,總之就輪迴啦。到F頂唔順開始冷淡個陣時,身邊人又扮晒無事發生咁,F開始變得歇斯底里,佢話好想揾到對方呃佢甚至出軌嘅證據,咁自己就可以死心。當然啦,個天點會咁易俾你收工,總之就係無料到,只能歸類為二人性格不合,F點會捨得放手。

點知有晚F無端端捉住身邊人傾,直接同人講覺得人地唔喜歡自己,好攰好辛苦,日日處於崩潰邊緣,一啖砂糖一啖屎啲fd。佢心諗如果個男人挽留佢就再試一次,又估唔到個男嘅認晒話依家已經無咗個種喜歡,更多嘅係關愛。又話好多佢自己嘅付出去到F到都會變得無比珍貴,好似揾到少少自己嘅重要價值。

F當然心都碎鳩埋,原來人地只係喜歡有人重視佢,個個人唔需要一定係自己,可以係anyone。於是乎佢狠心分手,向身邊人say goodbye。

F話其實佢真係曾經非常喜歡對方,但係俾對方言語同精神上折磨傷害咗咁耐真係好攰好辛苦。但當壓力大情緒崩潰連自己都憎自己時,就算再喜歡一個人,所有熱情都會俾重覆嘅傷害磨晒。最後連僅餘嘅希望同留戀等情感都灰飛煙滅,唯一留低嘅就係一塌糊塗嘅自己。做到咁又何必呢?勉強無幸福。

唉,其實一段關係上,雙方投放嘅情感對等與否好重要。唔係無時無刻都咁愛大家,可以一時對方比較愛,一時自己比較愛,咁樣先可以保持平衡。當有一邊不斷投放感情時都得唔到正面回應,其實一樣會頹一樣會放棄。呢個時候你就唔好受害者上身話人做唔到不離不棄乜乜柒柒。你點對人人點對你,當初你唔投放返相應份量嘅愛俾人仲要嫌棄人,就預咗人地遲早一招收你皮。走咗先嚟後悔就唔好啦。

感情唔係無窮無盡,你唔要人地就會收返嫁喇。