香港真係好多(google)拳例專家

 

尋日「神奇小子」曹星如同日本好手河野公平決鬥,最後曹星如傷出腰斬,以點數計曹星如獲勝。馬上有好多網民質疑:「吓?被人打到仆街都贏到?」好喇,大家都真係唔識拳例。之後有人搵到拳例,原來被人打到重傷還打到重傷,但拳例真係可以咁樣玩到曹星如贏。跟手就有班人(如Hello Wong 之流)批評返果班質疑曹星如贏嘅人,明明自己只係google甚至偷人圖(原圖)得知返嚟,就當埋自己係專家,高高在上批評其他網民。

曹星如呢場打得保守,一直瞄準機會打One、Two Combo刷點數,但對方亦不是省油的燈,雙方中拳次數亦差唔多,點數亦接近。但有睇直播都知道,河野選手拳比較重,所以睇落曹星如處於下風。而連曹星如經理人都表示,雙方都比較保守,似乎都想保留實力係後段發力。以腰斬前嘅表現,曹星如贏得冇說服力係鐵一般嘅事實。拳例上贏唔批評得?曹星如同河野公平賽後都話想重賽呀,即係佢哋都唔滿意咁嘅情況下分勝負,觀眾都有不滿有乜咁奇?觀眾講就唔得呀?冇畀錢睇免費直播就唔批評得?TVB選香港小姐冠軍又唔見你哋咁講?你有直接畀錢TVB咩?人哋Do姐有兩票合乎規矩呀!

觀眾、Fans不滿結果係好平常嘅事,呢班人就講到係香港人先有嘅事,仲要講到係錯咁。如果有睇史太龍主演嘅《Rocky II》,拳王阿波羅戰至最後僅以點數擊敗「意大利種馬」洛奇,便有大批拳迷柴佢台,認為佢唔係實至名歸嘅拳王,於是阿波羅就同洛奇重賽。呢種事情就算現實根本好常見,尤其大家對被冠以「拳王」之名嘅人有期望。曹星如被指係新拳王,但僅以此結束賽事,有乜唔批評得?香港人至會咁批評?係咪成世人未撚接觸過職業運動比賽?

香港人要撐香港運動員,呢點我同意呀。但曹星如本身呢場比賽只係為個人榮譽、排名而戰,本來贏好輸好就唔應該冠以「香港之光」、「香港之恥」等,因為佢唔係代表香港隊出賽。而退一步講,就算佢係代表香港出戰國際賽事,打得唔好被批評亦係等閒之事。1998年,碧咸代表英格蘭時犯錯被逐,翌日全英傳媒都大肆批評。2010年,阿根廷被德國狂數0:4,陣中球王美斯毫無表現,亦遭全國傳媒以至批評到體無完膚。2017年,拳王曹星如看似挨打下僅以點數取勝,海量(google)拳例專家、KOL公審批評佢嘅網民,相比之下,香港人真係對自己國家嘅運動員最好㗎喇,唔係咩?