如果你鍾意瘋狂OT,可以嚟我到做。

 

早排同個中學師兄食飯,講起我做嘢個到嘅文化,佢無端端同我講:

「如果你鍾意瘋狂OT,可以嚟我到做。咁啱我公司請緊人,你有興趣我可以幫你介紹。」

佢做邊行就唔講喇,免得自爆。不過我有啲朋友同佢同行,雖然冇佢個到咁癲每日冇十點走唔到,但起碼都會加班到八九點。唔係一個星期一兩日,係每一日都係咁。

或者我個人無乜事業心,又係一個非常典型嘅唔捱得90後廢青。如果要我每一晚都OT到十點,將人生所有時間奉獻俾公司嘅不如一槍打死我。我追求穩定有糧出唔洗日日做到隻狗咁就得,因為工作無辦法俾到我想要嘅滿足感我。

應該咁講,我衰貪玩,比起工作狂,我乜都識啲乜都試下,呢一種多姿多彩嘅生活先可以令自己過得滿足。當然,呢位師兄其實都係頗有生活品味同識得享樂嘅人,或者佢真係好喜歡自己份工啦。不過問心,我又的確對佢嗰行無乜興趣。

其實我覺得工作只係人生一部分,無咗份工當然乜都唔駛講,但又唔需要令自己嘅人生得返工作嘅。例如我會想學多門手藝,語言又得運動又得插花廚藝都仲得。呢個時候,嗰位師兄就話:

「揾到食咩咁樣?」

下,我真係冇諗咁多。如果凡事都要因為揾到食先去做先去學,咁你嘅人生都幾無聊。我有興趣所以接觸咗先,學定咗再將呢樣技能發展成揾到食嘅技能都唔錯。

曾幾何時,呢位師兄係我眼中係一個對人生好有熱情,睇興趣多過睇錢嘅人。唔係話佢依家完全變晒,只係可能人出社會耐咗(起碼耐過我),習慣咗個種思維,凡事睇咗利益先。

帶返頭盔先,唔係話呢種想法有問題,而係小感慨當日嘅熱血青春都不得不被現實磨光。希望我可以遲幾年,再遲幾年先開始有呢種想法。