Facebook 上推砌出來的我們

 

 

致一眾像我般渺小的普通人:

而家出現左好多男神女神,
Facebook 是但打啲野都二三百like,
Post 既大多數都係靚人靚景同好西,
除此以外,無個性、無睇法,
係我眼中,佢地就只係得虛有其表嘅表象,
但入面只係無靈魂無自我嘅一個個軀殼。

絕大部份人都鍾意人讚,鍾意俾人羨慕,
鍾意自己受歡迎,
所以好自然會將自己最好最靚嘅一面,
最靚嘅旅行景點,最繁花似錦嘅生活放上黎。

就好似政府推廣旅遊業既廣告一樣,
影住五光十色既夜景,璀璨耀目既繁華街道。
但係人都知道,深水埗劏房既六人家庭,
係屯門公屋餓死既母子,
受打壓入獄既一眾大好青年,
隔幾日就自殺既芸芸學子,
呢啲野每日都係我地既社會,我地既生活發生梗,
問題只在於我地睇唔睇到。

打呢個post 嘅目的,
並唔係要做智者批判一眾男神女神。
而係想同跟我一樣既普通人講:
不要去羨慕,不要去妒忌。

每個Facebook上面嘅人,
其實都同我同你一樣,
只係一個需要食飯訓覺扑野嘅凡人,
有工作疲累嘅時候,
有為情所困受傷嘅時候,
有孤獨寂寞嘅時候,
只係其他人知唔知道咁解~

我只知道無乜人會好似我咁,
成日將自己最核突醜陋既地底泥一面放上黎,
開口埋口又得mean野賤野衰野,
我都唔希望大家咁癲。
但係,每個人都有自己既特點同長處,
真係唔需要因為別人推砌出黎既美好形象而自卑架。

坦白講,好多男神女神離開左facebook,
就甚麼也不是了,
如果係現實生活見到,
即使佢企左係你隔離,你都未必留意得到。
因為,現實跟網上世界總是截然不同的。