香港人精神之二:幫人體現精神

 

(photo via cc Flickr user Toby Oxborrow)

 

早幾日先講完「槍打出頭鳥」精神,不如今日講吓香港人另一樣好常見嘅嘢:「搵替身」。唔好誤會,唔係七月十四亦唔係咩東洋忍術,而係想借人哋嘅行為黎表達自己嘅諗法、本質等。

好似曹星如單嘢,有人當日就登左文俾輔仁,覺得星如應該重賽。先唔評論佢點睇香港人嘅反應,畢竟唔係重點。「做人勝之不武,倒不如雖敗猶榮,咁先係香港人精神」呢句先係想今日嘅主題。

我唔知香港人幾時變到咁著重公平,雖然好多泛民支持者話司法不公又政治打壓咁,但又唔見佢哋大大聲企出黎話律政司勝之不武咁。講真,先不論其實輸贏係屬於曹星如同河野公平兩個人嘅事,用一個人嘅行為黎體現國家民族精神?我以為自己睇緊奧運呀大佬。

體現乜乜乜精神?由判咗星如贏個一刻起網民已經表現晒出黎啦。一堆比賽選手代表國家出賽就話啫,一個人比賽贏定輸同埋重唔重賽可以反映國民質素?唔好玩啦,我剩係知香港無乜幾多個好似星如咁為自己夢想搏到咁盡囉。

其實到底有幾多香港人真係可以言行合一,自己可以代表返自己以至香港人自己嘅「香港精神」?自己都做唔到,反而集體搵個代表黎話俾人聽自己本質係點,睇怕都係香港人精神之一啦。你要我講,星如言行所代表嘅只會係運動家同競技者精神,其實真係唔關香港人事,諸君亦無謂因為佢之後做咗啲咩而往自己臉上貼金啦。