其實香港教師真係認同要逼害學生的。

 

香港從來都唔興讚頌表揚,有嘅係充滿批評同抱怨嘅風氣,試諗下你溫書、做功課、考到好成績,有邊次老豆老母會讚?可能會讚一兩次,之後就會冇咗件事。聽聞唔少九十幾分都畀人鬧點解唔係滿分,到你攞滿分又話要保持住,人邊可能永遠保持高峰水準?

然後,往往喺你偷懶休息嗰陣,就會畀人話你成日掛住打機,想搵時間放鬆下都唔得,時時刻刻都要營營役役,但佢哋永遠忽略你拼搏緊嘅時刻。舉個例子你返工做咗成朝嘢,可能只係抽五分鐘左右嘅時候做下私人嘢又或者去下茶水間抖下,就畀人標籤話你蛇王,公平咩?吓?

一單畫算珠嘅功課新聞,就引嚟各種珍奇異獸嘅留言,真係千奇百趣,珍奇到你O晒嘴。一個人話自己係老師,老師係長輩,所以要尊重尊敬佢;尊重尊敬一個人唔係因為佢嘅身分或輩分,而係佢德行值得你敬重,呢種訴諸權威身分嘅思維,根本就蠶食獨立思考,假設佢真係老師,麻煩佢返去抄《師說》十萬九千次,重要字距、行距、字體大細全部一式一樣先收貨。

第二,佢話呢個係數學科,需要精確。點樣準確法呢?下面已經表示晒係個位、十位定百位咁,你一粒算珠就相等於嗰個位嘅一個單位,如果會因為大小而判定佢係十分一個個位、四分一個十位,咁我相信閣下智力一定非常高,高到無人能及,所以先會有咁獨特嘅思維,可以獨步天下。

唔好講話畀著你做唔做到,一個常人冇工具輔助冇長年累月訓練,好難手繪每樣嘢都一樣啩?我當你真係可以一模一樣,落筆都會輕重之分,要搵完全一模一樣嘅嘢,冇問題嘅,複製貼上、搵機器量產啦。但「係咪完全一模一樣」,呢樣又好似係哲學命題嚟啦,我就唔長氣講咁多。

另一條友,就話老師執著係因為希望小朋友有個規律嘅將來,做功課畫圓圈同規律嘅將來有咩關係我就唔知,但如果要講有規律嘅人生,就係work-life-balance,作息定時等各種各樣,況且,一個小三學生你咁快就要佢投身職場啦?到底生仔同教育係咩一回事呢?

如果生仔只係延續你嘅生命,填補你兒時嘅遺憾,甚至乎只係想「養兒防老」,咁你大可以唔使要佢返學或者讀好書,你求其塞個興趣班畀佢等佢識你唔識嘅技藝,然後求其打份牛工有穩定收入咁咪得囉。

但事實唔係咁啊嘛,每個人都係獨立嘅個體,每個人都有自己嘅生活,會有自己嘅家室,行條完全屬於自己嘅路。望住一堆有悖常理嘅留言,我開始懷疑常識重係咪常識,開始懷疑到底香港人個頭腦有幾精明,定還是只係好多好混亂嘅腦袋?

好心啦,虎毒不吃兒啊。重問邊個害咗啲小朋友,是非對錯都搞唔清楚啊。如果你問我想世界上消失啲咩嘢,我會話,希望所有人類都消失囉。