學識欣賞舞台說的故事——話不用多的方皓玟”My Spiritual Live”演唱會

 

近年睇演唱會,除咗睇本身位演唱者之,多咗一個習慣,就係睇舞台,睇每部份的表演內容,學識聽歌之外,學識感受整個團隊對於觀眾嘅心意。

有人話搞演唱會分分鐘唔賺錢,講真,係真㗎,你諗吓個台上面嘅燈光呀,背景呀,Book場採排呀,就算係阻住你唔塵你影相嗰位保安,樣樣都係錢,仲要未計請埋啲Dancer呢?嘉賓一定唔洗錢就請到呀?就算你韓星來港,你入場睇嗰張最貴又冇得坐企位飛$1680 ,賺嘅都分分鐘唔係韓星本身,而係中間啲乜乜物物公司。

所以唔知你見唔見,香港歌星搞嘅演唱會分分鐘搭個景仲用心過其他來港表演嘅明星,唔係因為韓星唔用心,而係搞嗰班人都知你唔理咁多㗎啦,但求睇到韓星,摸到佢手仔,講互動多過講聽歌嘅一場見面會,唱歌跳舞係其次。因此我唔經唔覺會用兩個心態去睇香港嘅演唱會同一啲韓星嘅show,前者會視為係香港歌手送畀Fans嘅禮物,後者就如前所講,係見面會。

而最近睇咗一場演唱會,場地喺九展,成個台放咗三四塊特大銀幕,歌手有得升上去上面跳舞,又可以落返嚟唱歌,你本來以為好簡單,但當開Show你就明,配合小明唱嘅歌,你睇到嘅唔係一場演唱會咁簡單,每個銀幕播放小明唔同嘅角度,播放唔同嘅背景,你嚟係睇真人版MV,唔係演唱會咁簡單,由葛民輝主導的”My Spiritual Live”方皓玟演唱會,可以話係一拍即合嘅音樂會。

相比起紅館可以大搞嘅演唱會,其實我更鐘意去九展比較集中,當然就唔會見到好特別嘅裝修,但喺方皓玟呢個演唱會入面,你會見到佢成場show活用緊佢每一個大銀幕,而與別不同的是,大部份歌手喺演唱會唱歌時都會播一啲片,呢啲片都係製作嘅一部份,而最令我印象深嘅係當小明唱佢首Let’s Say 時,播咗一條片係剪輯咗好多高官、好多樓盤、好多數字嘅片,但對應嘅歌詞係:

「渴望自由 找一個出口
買樓你想買樓 買到也不見得享受
慣性做木頭 思想已生銹
你可有想過走 過得更好更加風流

變做大人 應該更開心
那顆赤子愛心 獻給世間挫折翻騰
有愛就萬能 不必太擔心
哪需要爭冠軍 最緊要擁抱愛的人」

作曲作詞嘅方皓玟,大概就係想借呢首歌表達對香港人嘅勵勉,「無需背起痛苦與一塊磚頭,朋友活出自己就很足夠」,既諷刺社會又溫暖人心,除咗係導演葛民輝本身了解表演者嘅心,更係表演者與觀眾嘅對話,而演唱會本身,除咗想睇表演之外,唔係更加想知道一個唱作人本身對於自己作品嘅心境嗎?喺呢度,阿葛就幫方皓玟話俾大家知,佢對香港人嘅心思。

而當唱唵嘛呢叭咪吽,播咗一吓鐘聲,之後開始出現流水漣,對應佛教嘅上善若水,聽住小明唱第一句:「你莫需衝動」,承接前段節奏強勁嘅快歌,呢一part唱一啲多啲嘢諗嘅歌,講真,睇到呢個音樂監製、導演,同歌手嘅演唱會,無憾。

仲有一點不得不提嘅,係最後一節,小明著住婚紗出嚟唱歌,印象中除咗梅艷芳之外,佢都係近年唯一一個演唱會著婚紗嘅歌手,想當年啲人話梅姐係嫁咗畀舞台,淒美而傷感,而小明,我相信佢除咗嫁咗畀佢老公之外,同樣嫁咗畀音樂,努力咗十幾年,堅持一樣嘢,由覺得「我看見了夢 夢卻看不見我」到依家「我只想跟你一起面對苦痛」,我諗由佢堅持嘅嗰刻開始,早就披上音樂嫁衣了,呢一種心思,可能係我過份解讀,但我覺得,小明係想藉此表達佢對家人愛人嘅愛,亦係想表達佢對支持者嘅愛,

所以睇演唱會,如果仍然留喺淨係想睇表演,仍然停留係扮Encore再出返嚟,又或者係停留係分享會上面其實冇意思,成場Show其實小明講嘅嘢唔多,講咗少少自己經歷,講咗少少想多謝嘅說話,簡單直接就夠,有啲嘢,真係在心中,要明白一樣嘢,喺香港,歌手搞一場演唱會,真係對歌迷嘅答謝,賺錢,真係後後話。