性交轉運法師應學關景鴻

 

以後做性交轉運嘅法師,真係要認真向關景鴻學習,講明不成功不收費,或者列明「否則原銀奉還」條款,就可以避免俾人告欺騙性交。成唔成功,事主本身有責任架。等如你申請唔到移民,可能真係自己個底花曬,關關景鴻咩事?做法師真係好慘,消耗左法力,仲要俾人告番轉頭。

以最近一單性交轉運新聞為例,女事主個男朋友是否跟女事主復合,決定權在佢男友度,而非降頭師。但既有位女事主來求助,降頭師只好運用佢嘅專業知識去幫女事主囉。點能夠跟法師性交兩次之後,女事主發現男友唔肯復合,就去告個法師欺騙性交呢?

睇醫生都無話就一兩次就包醫好啦,兩次唔得,咪睇第三次,再唔得就Keep住覆診囉。好多病可能要覆診幾十次歷時幾年先醫好架。性交轉運都係一樣,性交兩次唔得,點解唔性交第三次,或者好似睇醫生覆診咁,長期Keep住約法師性交呢?

當然,這單案嘅是非對錯,內裡細節,要交由警察去查,再由法庭去判啦,我無資格做判官。但既然案件上曬傳媒,已變成公眾事件,我只係以此作為Case Study,用常理跟大家分析,以免大家誤入歧途、誤墮法網遮。

又以呢單個案為例,十萬蚊,不管對有錢人還是窮人,都不是細數目。一個女仔手上有十萬蚊,唔送俾自己條仔,或者唔請條仔去旅行一齊Happy,又或者唔儲起佢計劃將來同條仔一齊供樓過活,大拿拿俾十萬蚊一個法師同佢做法事希望條仔同佢復合,可見呢個女仔個價值觀同處事方式都係好怪,佢呢種性格一定會從其他日常生活細節度反映出來,男友覺得佢難相處而拒絕復合一啲都唔出奇。

當條仔唔同佢復合,個女仔唔係第一時間去檢討一下自己個價值觀和待人接物方式,唔去好好跟男朋友仔細溝通,了解彼此是否適合繼續係埋一齊,而係第一時間諉過他人,發惡控告個法師欺騙佢!一個凡事唔會自我反省嘅人,又點會有人鍾意同佢相處丫?

至於性交轉運到底有冇功效,我唔評論啦,就等如坊間好多服務,又美容、減肥、甚麼自然療法之類,林林種種,有冇效自己思考。作為成年人,你去幫襯,假如是公平交易,明碼實價,大家你情我願,有咩話邊個呃邊個?而作為從業員,雖然話搵食遮,但你真係要學識保護自己,向關景鴻學習點樣戴定個頭盔,防止自己俾人控告欺騙。而作為消費者,你更加要自我反省,正所謂求人不如求己,要解決問題,係唔係下下靠消費就解決得到?