【體檢中心的早與晚】唔嫖唔知身體好,唔驗唔知戴綠帽

 

 

話說,其實一直以來,體檢中心的客人裡面,大陸客人佔左起碼都有六、七成比例生意,所以大陸健康政策有咩改動,好多時都會影響到公司的生意。例如,係大陸係禁止驗胎兒性別,所以就有唔少大陸人會千方百計來港做胎兒性別鑑定。

而自從放寬一孩政策之後,有唔少大陸父母希望「追多個」,趁住更年期之前生多件,但係過左35歲之後,其實就係高齡產婦,一旦再次懷孕,高險就會相當高,因此唔少大陸人都會落黎香港做個產前檢查,睇下自己仲適唔適合懷孕。

話說,當時大陸岩岩放寬左「一孩政策」,就有對四十歲左右的夫妻來港做個產前檢查。咁呢對夫妻呢,根據佢地既講法,其實佢地本身都已經有個仔,而且個仔都十幾歲,不過難得見「一孩」變「二孩」,又心思思想生個女,於是就來香港驗一驗,睇下自己仲適唔適合生B。

每次都產前檢查都係咁,老婆就大把野驗,而老公只需要簡單驗下生育能力、有無乙肝或者一D遺傳性疾病基因就得,所以老公好快就驗完出黎等報告。

點知,報告一出,指出老公既精子質量有問題,差到幾乎係去到不育的水平。呢個時間又要講解一下,其實醫學上係好難完全肯定一個男人無生育能力,因為男人每次射精時,都有數以億計既精子,就算男人的精子質量再差,都可能有一粒、半粒精子係異常地健康,而又好好彩咁同卵子結合到,最尾生個B出黎。除非個男人肯定無法製造精子,又或者比人閹左,先可以完全肯定個男人無生育能力。

回歸返頭先件事,正所謂「唔嫖唔知身體好,唔驗唔知戴綠帽」,個男人無生育能力,咁佢個仔又係邊度黎既呢?當睇完份報告,個男人咩都無講,粒聲唔出,搞到我都好大壓力。始終對男人來講,不育都係一件幾無面既事,戴綠帽就更加,可能係佢心中都唔知比咩反應我,所以我都索性行開,費事比壓力佢。之後個老公自己一個去見醫生,我都無陪佢。然後老公等埋老婆驗完出黎,兩公婆就靜靜地走左,之後我都無再見過佢地,亦都唔知佢地最終會點樣。

睇到呢到,或者你會諗,個老婆很肯定勾佬啦。不過,我可能話比你聽,之後越來越多夫妻驗身時出現呢種情況,唔會有咁多人勾佬掛?其實男人既精子質量,並唔全部係天生就注定,好多時候會出現咁既情況,年輕時男方有心有力,所以就生到BB;但人到中年,年紀大,加上大陸環境、空氣質素都麻麻,再加上工作壓力大等自身因素,都會令精子質量變差,甚至不育。因此個仔好可能都係自己既,只係隨住年紀大,加上其他問題而失去生育能力。順帶一題,當精子質量變差之後,就算成功令女方受孕,都有機會將精子質量的問題遺傳比下一代,所以「有仔趁嫩生,有閪趁嫩屌」真係無講錯。果D老豆老母教D細路哥要努力讀書,唔好咁早溝女,就擺到明係陰鳩自己仔女。而我相信,個老公去見醫生時,應該同佢解釋左呢個可能性,只係我一心以為佢戴綠帽姐。

呢個故事,其實都提醒左我,做人唔好咁武斷,其實個仔係唔係自己既,有無戴綠帽,應該用科學一點既方法,驗DNA,驗生育能力係CHECK 唔到個仔係唔係自己架。