當香港隊踢出代表作時,你只係關注有幾多人噓国歌

 

東方日報圖

 

如果你冇入場睇波,又錯過左直播,而你又想係網上搵資訊話俾你聽香港隊踢成點。有嘅,不過好難會搵到同睇到啫。因為香港隊踢成點,香港隊出唔出到線,冇香港人想知呀!

但若果你真係好想知,我可以係到話你知,香港隊好波!呢個好波,唔止係打氣個種,而係真讚美。唔誇張講句,今晚對黎巴嫩一仗,幾可稱為近年港隊代表作。

三位新近入籍嘅球員,融入速度奇快,亦令到Kim sir 嘅343,正確黎講嘅3412 更加強,上半場頭段完全係將黎巴嫩壓過去,打出主攻嘅足球。現時嘅陣容結構,踢出黎,除左徐德帥同麥基值得相榷下之外,基本上都係最強,分工係清晰,尤其是三人華將中場 — — 黃威負責進攻派牌,陳俊樂係box to box,而黃洋就繼續由守轉攻嘅第一點,係好明顯嘅進步。

我唔會講如果樂仔冇俾人趕出場,場波最後會點,因為冇意思。但無可否認,如果樂仔在場,可以釋放黃威同徐德帥更多攻力。的確,樂仔係未被人趕出場之前,其實係好多中場爭奪都贏。扯遠少少,香港真係好少踢法咁辣嘅球員,樂仔呢種辣如果控制得宜(表表者係荷蘭嘅雲保美),多啲聰明犯規,其實對香港嘅中場相當大好處。

0比1呢個比數係遺憾,出線亦要作客贏到北韓先有計傾。姑勿論如何,今日香港隊嘅表現,加埋一萬人入場,作為港隊2017年告別戰,係開心嘅!

 

東方日報圖

 

但係,你打開個網,打開電視,鋪天蓋地都係講噓国歌。回想起兩年前,當時香港隊仲打緊世界杯外圍賽,我仲係某電視台嘅新聞部做嘢,都仲會係頭條講下香港打成點,贏定輸。時移世易,国家統戰機械令下,誰敢不跟?依家各家傳媒頭條、即時新聞直情只講在場球迷點噓国歌。香港足球,who fucking care?唔係有人噓国歌,我地會派咁多crew去影你場波,你都傻傻地。

香港足球係避孕套,用完即棄,我都明白。我只有一個思考,個啲口口聲聲話球迷將足球政治化嘅人,你地何嘗唔係做緊同樣嘅嘢?要人地尊重国歌,你咪做宣傳,去學校搞你嘅愛国教育,教人點樣尊重国歌囉,咁點解你又要將個焦點放係球場?當然,有啲人今日仲講「政治龜政治,體育龜體育」,你就繼續活係你美麗嘅幻想泡泡喇下,祝你永遠唔使出黎。

或者,最悲哀嘅係,當香港隊踢出代表作時,你只係關注有幾多人噓国歌。