馮盈盈都叫唔造作,咁麥美恩叫咩?

 

 

「我覺得呢個港姐都幾好,起碼唔造作。」男友Mike邊看《學是學X》邊說。
「下,你講邊個?」我說。
「好似叫唔知咩盈盈。」Mike說。
「下,佢咁都叫唔造作?咁麥美恩叫咩?」我驚訝地說。
「我意思係佢都叫靚女,但佢都肯扮鬼扮馬扮醜扮傻咁演出啫。」
「超,麥美恩夠扮鬼扮馬啦,仲扮得勁過佢添啦。」我說。
「咁佢唔係靚女嘛…」Mike說。

無可否認,人靚真的比較多著數,至少兵都可以收多一點,發姣都可以稱為不造作、率真。說句公道說話,盈盈都算靚,雖然比她有氣質/靚的藝人也大有人在,例如李佳芯、黃心穎等,但盈盈都叫做比上不足,比下有餘。靚也分很多種,清純的、詩文的、誘人的、可愛的,不知道盈盈應歸哪一類,只感覺她在女人角度來看是不討好。

男人和女人看異性一向都很不同,而女人總有一種敏銳的直覺,在適當的時候用來判斷另一個女人並將她分類。有時遇到心機女同事,嗲聲嗲氣兼挨身挨勢,一看就知是狐狸精格,但男同事是從來不會覺得有問題,只會說:「哎呀人哋把聲本身係咁,可能佢熱情咗少少啫。」甚至會說:「你唔抵得人哋女人過你呀?」Fine,你繼續做你的兵,我當然不會過問,反正你很enjoy,而且有時看著男同事被人玩弄於股掌之中還可以當是工作娛樂之一,看到他們出錢又出力,還不求回報,真是令小妹佩服得甘拜下風。

「今日喺中環見到張智霖呀!真人好高大,仲好靚仔!」我興奮地說。
「下,佢都叫靚仔?咁吳彥祖叫咩?」Mike驚訝地說。
「吳彥祖係型仔,唔同㗎。」我說。
「真心唔覺得佢靚仔囉,都唔知點解咁多女fans。」Mike說。
「你係男人,你唔明㗎喇,你繼續睇你嘅盈盈啦。」我說。
「唔係掛你記到而家?」Mike說。
「女人不嬲都記仇㗎啦,嘿嘿。」我說。

 

P.S. 有時我好奇會問男友看不看得出男人是真大隻還是假大隻,男友又會問我看不看得出女人是真胸還是假胸,其實最後也是大家亂估而已XD