閉著目承認故事看完

 

十三年前既情人節,阿峰同阿智一齊左。
十年前既情人節,佢地開始左同居生活。
七年前,佢地一齊養左隻狗。
四年前,阿峰落街買底雞蛋仔俾阿智食個陣,
俾架的士撞到,一直昏迷。

上年既情人節,阿峰醒番。
但佢嘅意識同記憶停留左喺中五。

係阿峰昏迷個三年入面,
阿智每日放工都會去探阿峰,
同佢講下今日番工發生左啲乜野事,
屋企隻狗又唔聽話咬爛左啲乜,
自己有幾咁掛住佢,
錫下佢塊面,播下佢地D定情歌同生活片段俾佢聽,
幫佢按摩下啲肌肉,等佢醒番都仲行得走得,
每星期都會陪阿峰媽媽去拜神,
阿峰媽咪成日都話自己好似多左個仔咁。

但當阿峰醒番個一刻,
一切都徹底改變晒,
阿智好開心咁攬住阿峰:
我終於等到你醒番啦,無事架啦,我地以後一定會好幸福架!

阿峰好大力咁推開左阿智:
「你係邊個呀?」

阿峰嘅意識停留左喺中五,
個陣既阿峰仲未肯承認自己鍾意男仔呢個事實,
阿峰同媽咪講:我唔係基架,你叫個個男仔唔好再黎得唔得?

阿智由三年前一直都覺得,
人既生命原來係幾咁脆弱,
呢三年黎都同自己講要好好珍惜眼前人,
但到個一刻佢至發現,
原來人既記憶都一樣咁脆弱。

十三年以黎,阿智每一日既生活都有阿峰,
到阿峰出院,佢每日收工之後無得再去醫院探阿峰,
返工有乜野唔開心唔可以再同阿峰講,
就連見都無得見,錫都無得錫。

佢試過帶住隻狗去阿峰樓下,
狗仔雖然有三年無見過阿峰,
一見番阿峰就衝住跑去阿峰到,
但阿峰眼中就只有一個基佬同一隻癲既狗。
原來,狗既記憶比人既記憶更長更深。

阿智開始諗,如果阿峰無醒番,
咁佢既日子係咪會開心啲?
但佢知道,
佢就好似從來都無係阿峰生命入面出現過一樣,
自己只係無任何牽絆,無關痛癢既一個人。

阿智仍然愛阿峰,
但佢好清楚自己需要係阿峰對佢生厭之前放低自己嘅執著,
俾阿峰開始自己既新生活。

至於自己,就一直停留左係四年前車禍既個一晚,
佢走唔出個一晚,都離唔開十三年以黎每一日既自己,
佢決定左今年既情人節,
會自己一個人移民去加拿大,
永永遠遠都唔會再番黎香港。

作為佢既朋友,
我只可以支持佢嘅決定,
我,真係唔識得點樣去安慰佢。

或者,好多年後既某一日,
阿峰會無啦啦記得番阿智,
咁阿智就會得到佢值得得到嘅好結局。