衝定唔衝,計計代價

內容: 
自由標籤: 

NOW直播三個年青人對話:

右邊身型較肥大概講:「我都食左一粒彈啦,你要走未走囉?!」左邊個冷靜好多分析利弊。明顯有好多青年有好鬼火,亦有較冷靜。知好多年青人好火。大部份人和平示威,卻被定性為暴亂… 當大家係「暴徒」然後被喪射喪追喪打。

雖然夏慤道的磚掘出,但被其他示威者制止左。丟都無丟過,大部份人手無寸鐵,警務署長記者會話丟鐵馬會死人,尖鐵會死人。咁我拳頭係致命武器你就向我頭開槍牙?

網傳一個無間道警察動之以情,欣賞年青人的激情、勇氣之餘,力勸不要盲衝。

原因是警方有裝備、合法武力;年青人食雞基本套裝,裝備石器時代也不如,做嘜都係唔合法。用年青人Wording,打完LV1政總外圈,還有LV2內圈,LV3正門 及LV4在內休養生息的速龍外省隊混合隊?當你LV1得左,LV2血都扣左大半,你點捱入去?

我直覺筆者動之以情,所以留言讚好。但文章好壞參半,因為他不記名所以一些人不以為然。

繼前篇〈對抗謊言的最佳武器: 不是暴力,乃是真相 (一)〉,我依家試試解釋點解唔好衝。原因一:我唔想見倒有年輕人、學生因而受傷,被慈母打鑊金,甚至死亡。二:612後我更確定香港無可能有太陽花學運,因為個政府唔係民選架! 百萬人上街佢都睇唔倒鬼睇倒你! 好似子華神話齋做政權最愛知識份子,尤其係死左果啲。所以你未死佢會整死你~!林鄭就係咁樣話愛你愛到要開槍殺死你喎。

我嘗試冷靜分析下。「打仗」要知己知彼,你坐低計過你實力未? 無任何準備就上擂台,預左被打死啦。

<知己>
用我廢中例子,我176磅,高五尺十。我14/15歲開始健身,大學再健身中心練。
- 這十年重鍊,向著健身和徒手健身之路進發; 我胸推可推150磅 (啞鈴) X 8 RM X 3 組
- 曾有八年健身牌,無續停左
- 為免我變了大笨熊,我hea學了一年泰拳;
- 又為免我心肺不佳,跑了兩年山跑。上年4月由每月累積100公里練到9月200,但傷患停了半年,現在慢慢pick up。我參加過不同的運動比賽,但反射神經一般,持久力一般,太重陪跑無奬攞。

我講咁多唔係曬命,係想話我訓練量係同齡頭20%,亦相信勁過好多後生; 唔計特警,應該比一般差佬勁 (謙啲唔差過一大半)。

如果你連學堂的訓練都未試過,如果你連我廢中輸比賽嘅訓練量都無,你勇武嘜__野呀?

好,就當你天生骨格精奇,係練武上乘材料,半年熟習各站立格鬥技、巴西柔術等,煙霧彈梨時你用桶水整熄曬佢。咁之後呢? 警察向你近面發射橡膠子彈,你就真係射出熱血! 無戴眼罩,隨時眼盲。若警方失控向人群開散彈槍,就當你係李小龍再世+葉問v6.0,你真係可以一個打十個? 我當你勇武搞掂一個,咁其他差人見自己友LUM左,佢地唔會更兇更喪報仇咩?

<知彼>
幻想一打十,最後味十個揼__你一個。何必呢?! 警察裝備自己上網睇片作賽後檢討。懶得寫。

<我火,但為嘜火?>
除左失衡暴力係咁射射射,殺殺殺。就係香港人做嘜打香港人? 我納稅梨養人打自己痴線架?

其中最火係見差人抓人啫啫。黃之鋒都講過我春袋好好玩咩? (佢被拘補扣留時被「性侵」) 我想話小學生先玩「閹」啫,幾二歲人重玩閹? 咁係性侵喎! 告得!

如果你認為差人火嘜都得,咁學生唔聽話,我係未可以抽佢啫啫扯佢出班房呀? 個學生唔乖駁咀唔交功課衝擊我底線,我係未可以打到佢飛起? 我唔得,咁點解你又得呀?

坦白,如果抽我啫啫,我痛我會條件反射一腳伸埋去。當然講就威… 做就… 為左唔會有咁事情發生,我唔咁近前線自保先。但唔代表企前面我就好Welcome比人閹。我真心欣賞班後生仔,我係你咁大時唔係打機,就打__機。成日惗住幾時拍拖… 但你地已為自己生存空間掙扎求存。

重有係啲女仔,烈女一樣,又大力又抬得。其實相比下我承認我有啲自卑架…

<除左衝,重有無其他方法>
回下帶,我個人認為瞓係地下等佢抬走,睇佢抬得幾多個。你抽啫實告你非禮/侵犯。當然Hea住做,認真你就輸。如果雙方Hea住做,其實唔洗咁對立。林鄭先係幕後黑手,差人仇視細路; 細路仇視差人為嘜?

要打,要對等實力,唔好大蝦細,唔好蝦女仔,唔好蝦老人家。上擂台有規有矩。否則香港市民有其他方法回禮。我係文人,會用文回你,武梨保護自己。

但我唔會指責衝果班。一來係林鄭唔聽民意 二來大部份後生有幾暴力啫。香港人行街睇戲食飯拍拖就多,為兩餐疲於奔命,學生就忙於功課Project考試。如果有得揀,邊個想咁辛苦出梨比人打架? 邊個有我咁變態要練野虐待自己咁嚌。用呢個角度惗,警察自己咁多裝備咁疊馬怕細路?

我恨不得我係Marvel Wolverine不斷再生能力殺入會議廳; 或蝙蝠俠用錢壓死班狗官。但我唔係嘛,只係一個窮___、廢中; 大家都係普通人。係英美西歐果啲示威係威,咁係外國嘛,主要有民主議會,你無咁點啫? 味要惗下有無其他方法低成本又高果效呢? 唔係高成本又低效果自焚一樣。

大家真係要惗多啲計,有巴打寫信去外國領事,非常好波。我寫左去香港領事翻譯何君堯議員話想關閉註港美領事館喎。不論人地領事唐將軍睇唔睇,我地片地開花和平不合作運動。以前甘地係咁、馬丁路德甘係咁,因為知道以暴易暴,以惡報惡唔Work,歷史評價企佢地果邊; 我地雨傘係輸到貼地,但我地贏左世界聲譽,直至612都係。

以惡報惡,愈惡愈得有例子,北韓、非洲等內戰國家同天朝Work,但你夠鬥咩?按歷史滿清覆亡都有好多因素,唔係心口夠勇就得。我信上帝會有佢時間。無計。我急佢唔急無法架…

國際輿論企係我地呢邊,若有人仇殺警察,咁我地百萬遊行就玩完,失去左自雨傘以來合法性同道德高地。當然如果天朝毒啲殺人架禍推落示威者度,拍戲一樣都得。趁我地重有言論自由同網絡自由(可能自以為有)各出其媒。

精人出口,笨人出手呀!

#下回講學堂出嘜問題 #今次用俗語因為對象係年青人 #睇埋前文會整全啲 #唔好將張相Share去基吧 #有個大隻過我612都係行行企企Hea住睇 #你瘦到無飯食咁你衝嘜? #我跳幾個欄就籮柚抽筋老喇 #教育焗腸誤判 #唔係老師叫學生去 #係叫佢地唔去都去 #你唔睇佢地未重出事 #你以為搞老師就得? #依家係你地班離地官口是心非人面獸心